15-16 noyabr 2022-ci il tarixlərində Gürcüstanın Tbilisi şəhərində Milli İmmunlaşdırma Proqramı rəhbərlərinin görüşü keçirilib.

 

Aztibb.az xəbər verir ki, Ümümdunya Səhiyyə Təşkilatının (ÜST) Avropa regionunda yerləşən 6 üzv dövləti – Azərbaycan, Belarus, Gürcüstan, Ermənistan, Moldova və Ukrayna immunlaşdırma proqramları ilə bağlı bir araya gələrək problemləri müzakirə etmək imkanı əldə edib. ÜST-nin Ölkə Ofisi və milli tərəfdaşlarla yanaşı, digər təşkilatlar – UNICEF, IFRC, USCDC, Avropa Komissiyası, GAVI və immunlaşdırma proqramı ilə əlaqəli qrup və qurumlar da görüşdə iştirak edib.

 

Görüşün ilk günündə Avropa İmmunlaşdırma Gündəliyinin 2030-cu ilədək Fəaliyyət Planı layihəsi (AİG 2030) nəzərdən keçirmə və əlavələrin edilməsi üçün ölkə qruplarına təqdim edilib və plenar iclas zamanı təkliflərin müzakirəsi aparılıb. Eyni zamanda, ÜST-nin Avropa Regional Ofisinin ekspertləri tərəfindən COVID-19 vaksinasiyasının nəticələri, epidemiyalara hazırlıq və peyvənd olunmamış qruplara yetişmə yolları ilə bağlı təqdimatlar verilib. İclasın ikinci günündə ölkələrdə immunlaşdırma ilə bağlı bərabərsizliyin aradan qaldırılması üçün qrup müzakirələri həyata keçirilib.

 

Gündəliyə ÜST-nin Avropa regionunda Hepatit B ilə mübarizə, immunlaşdırma üzrə informasiya sistemlərinin rəqəmsallaşdırılması, immunlaşdırma üzrə təkmil monitorinq sistemlərinin, eləcə də peyvənd təhlükəsizliyi üzrə hesabat mexanizmlərinin və sistemlərinin yaradılması ilə bağlı mövzular üzrə təqdimatlar və müzakirələr daxil edilib. Görüşdə Səhiyyə Nazirliyi, Respublika Gigiyena və Epidemiologiya Mərkəzi, TƏBİB, Milli İmmunlaşdırma üzrə Milli Texniki Məsləhətçi Qrupu, ÜST və UNICEF Ölkə Ofislərinin nümayəndələri iştirak edib.