Elmi-Tədqiqat Pediatriya İnstitutunda (ETPİ) 14 Noyabr - Ümumdünya Diabet Gününə həsr olunmuş elmi-praktik konfrans keçirilib.

 

İnstitutdan Aztibb.az-a verilən məlumata görə, tədbiri giriş sözü ilə müəssisənin direktoru, t.ü.f.d., dos. Allahverdi Musayev açıb. O, hər il dünyada təxminən bir milyon insanın ölümünə səbəb olan şəkərli diabetin ciddi təhlükə törədən, kəskin ağırlaşmalarla müşayiət edilən xroniki xəstəlik olduğunu bildirib. Direktor diabetlə bağlı qlobal məlumatlılığın artırılması, həkimlərin bilik və bacarıqlarının təkmilləşdirilməsi istiqamətində interaktiv müzakirələrin təşkil olunması məqsədilə belə konfransların keçirilməsinin vacibliyini vurğulayıb.

 

Daha sonra t.e.d., prof. Səfixan Həsənov çıxış edərək şəkərli diabetin digər xəstəlikləri kəskinləşdirə biləcəyini, ana və uşaq sağlamlığına mənfi təsir edəcəyini deyib. Qeyd edib ki, bu xəstəliyin profilaktikası və müalicəsi vaxtında aparılmasa, çox ciddi fəsadlar törədə bilər.