“Medinex-2022” Tibb İnnovasiyaları Sərgisi çərçivəsində “Tibbi Ərazi Bölmələrini İdarəetmə Birliyi” publik hüquqi şəxs və “Medtest” MMC arasında qarşılıqlı əməkdaşlıq haqqında Anlaşma Memorandumu imzalanıb.

Memorandumu TƏBİB-in İcraçı direktoru Vüqar Qurbanov və “Medtest” MMC-nin İcraçı direktoru Cavid Əsədov imzalayıblar.

Sənəd ikitərəfli və qarşılıqlı faydalı əməkdaşlığın qurulması məqsədilə şəkərli diabet sahəsində elmi və texniki imkanlardan müştərək istifadə edərək diabet xəstələrinin zəruri, müasir, keyfiyyətli, yerli və beynəlxalq standartlarla tələbatlarını təmin etməyi, şəkərli diabet və endokrinoloji xəstəliklərin müayinəsi, müalicəsi və statistika sahəsində həkim, laborant və alimlərin ehtiyac olduğu dəstəyi, şəkərli diabet xəstəlikləri sahəsində biliklərinin arıtırılmasını, istehsal olunan məhsulların keyfiyyətlərinin mükəmməlləşdirilməsini nəzərdə tutur.

Memorandumun məqsədləri Azərbaycanda diabet xəstələrinin tələb və istəklərini müəyyənləşdirmək, şəkərli diabet xəstələri üzrə yaradılmış məlumatlar bazası əsasında imtiyazlı qrup xəstələrin şəkər əleyhinə olan dərmanlarla təmin edilməsini yaxşılaşdırmaqdır.

Tərəflər memorandumun məqsədlərinə nail olmaq üçün şəkərli diabet sahəsində bir sıra birgə layihələr həyata keçirəcəklər.