Bu gün Akademik M.A.Topçubaşov adına Elmi Cərrahiyyə Mərkəzinin həyətində “Zəfər” abidəsinin açılışı olub.

Mərkəzdən Aztibb.az-a verilən məlumata görə, abidədə 44 günlük Vətən müharibəsində işğal edilmiş torpaqlarımızın azad edilməsində Müzəffər Ali Baş Komandan, möhtərəm Prezident İlham Əliyevin rəhbərliyi ilə Azərbaycan Ordusunun göstərdiyi şücaət və xalqımızın “dəmir yumruq” ətrafında birləşərək əldə etdiyi qələbənin rəmzi əks olunub.

Abidənin açılışında Elmi Cərrahiyyə Mərkəzinin direktoru, professor Rauf Ağayev çıxış edərək İkinci Qarabağ müharibəsinin tarixdə Azərbaycanın şanlı qələbəsi kimi qalacağını vurğulayıb. O, bu qələbənin qazanılmasında xalqımızın birlik və həmrəylik göstərdiyini qeyd edib. Vətən müharibəsində tibb işçilərinin rolundan da danışan direktor kollektivi Zəfər Günü münasibətilə təbrik edib. 

Daha sonra Elmi kardiocərrahiyyə şöbəsinin müdiri, professor Fazil Abbasov, Elmi anesteziologiya, reanimasiya və intensiv terapiya şöbəsinin müdiri, professor Fuad Həsənov 44 günlük Vətən müharibəsində qazandığımız şanlı Qələbənin əhəmiyyətindən, Azərbaycan Ordusunun qəhrəmanlığından söz açıblar. Çıxış edənlər mərkəzin kollektivinin Vətən müharibəsində yaralanmış əsgər və zabitlərimizin malicə və reabilitasiyasında göstərdikləri xidmətləri diqqətə çatdırıblar. 

Sonda abidə önünə mərkəzin kollektivi tərəfindən əklil və gül dəstələri qoyulub.