Tibbi Ərazi Bölmələrini İdarəetmə Birliyinin (TƏBİB) icraçı direktoru Vüqar Qurbanov “Medinex” Azərbaycan Beynəlxalq Tibb İnnovasiyaları sərgisində iştirak edən İsrailin əczaçılıq sahəsi üzrə fəaliyyət göstərən “BioPharmax Afezco” şirkətinin icraçı direktoru Yossi Zabari ilə görüşüb.
Aztibb.az TƏBİB-in rəsmi feysbuk səhifəsinə istinadla bildirir ki, görüşdə sözügedən şirkətlə əczaçılıq sahəsində əməkdaşlığın genişləndirilməsi müzakirə olunub.
Qeyd edilib ki, Ələt Azad İqtisadi Zonası ilə İsrailin “BioPharmax” şirkəti arasında imzalanan müqaviləyə əsasən, “BioPharmax”ın Azərbaycandakı istehsal sahəsinin tikintisi, eləcə də 50 adda tibbi məhsul istehsalı nəzərdə tutulur.
TƏBİB-in icraçı direktoru Vüqar Qurbanov İsrailin əczaçılıq məhsullarının keyfiyyətindən, vaksin, antibiotik istehsalı sahəsindəki təcrübəsindən danışıb, qarşılıqlı əməkdaşlığın faydalı ola biləcəyini diqqətə çatdırıb.
Əczaçılıq sahəsi üzrə fəaliyyət göstərən İsrail şirkətinin nümayəndələri istehsal etdikləri məhsullar haqqında ətraflı məlumat verib. Azərbaycanda da ixtisaslaşdıqları sahə üzrə istehsala maraqlı olduqlarını, gələcəkdə TƏBİB-lə daha sıx əməkdaşlığa hazır olduqlarını bildiriblər.
Görüş zamanı əczaçılıq sahəsində əməkdaşlığın mövcud vəziyyəti və perspektivləri müzakirə olunub.
