İnformasiya Texnologiyaları İnstitutunun növbəti onlayn elmi seminarı keçirilib.

İnstitutdan Aztibb.az-a bildirilib ki, şöbənin əməkdaşı Nərgiz Şıxəliyeva “Sosial mediada tibbi məlumatların sentiment analizi” mövzusunda məruzə ilə çıxış edib.

Məruzəçi tibbi sosial şəbəkələr, onun münasibət seqmentləri, informasiya mənbələri, maşın təlimi metodları, sentiment analiz və s. haqqında məlumat verib. Qeyd edib ki, bu gün həkimlər, pasiyentlər, tibb bacıları tibbi sosial şəbəkələrdən və onlayn platformalardan istifadə edərək sağlamlıq problemləri, xəstəliklər, dərmanlar və s. ilə bağlı biliklərini, rəylərini bölüşür, məsləhətlər alırlar. Tibbi sosial media subyektlərinin belə fikir və rəyləri media resurslarını tibbi xidmətin keyfiyyətini yaxşılaşdırmaq üçün əhəmiyyətli informasiya mənbəyinə çevirir. Bu mənbələrdən istifadə etməklə müvafiq qərarların qəbul edilməsi sentiment analizin tətbiqini aktuallaşdırır.

Sonda mövzu ətrafında fikir mübadiləsi aparılıb, çoxsaylı suallar cavablandırılıb.

Şöbənin rəhbəri, AMEA-nın müxbir üzvü, texnika elmləri doktoru, professor Məsumə Məmmədova və baş elmi işçi, texnika elmləri doktoru, dosent Zərifə Cəbrayılova çıxış edərək mövzuya dair fikirlərini bölüşüblər, gənc tədqiqatçıya müvafiq istiqamətdə dərin elmi araşdırmaların aparılması ilə bağlı təklif və tövsiyələr veriblər.