Oktyabrın 24-25-də Azərbaycan Tibb Universitetinin (ATU) İnsan anatomiyası və tibbi terminologiya kafedrasının müdiri, dosent Anar Abdullayev Türkiyənin Elm və Sağlıq Dərnəyinin dəvəti ilə İstanbulun Bahçeşehir Universitetində baş tutmuş nəzəri-praktik elmi konfransda iştirak edib. 

Aztibb.az ATU-ya istinadla xəbər verir ki, A.Abdullayev Türkiyə, Qazaxıstan və Moldovadan konfransa qatılmış mütəxəssislər qarşısında “Üzün inkişafı. Üz əzələlərinin formalaşması” mövzusunda məruzə ilə çıxış edib, iştirakçıların çoxsaylı suallarını cavablandırıb.

Qeyd edək ki, üzün anatomiyasına maraq bütün dövrlərdə mövcud olsa da, müasir zamanda plastik və rekonstruktiv cərrahiyyənin, kosmetik əməliyyatların artması, təbii ki, bu sahəyə diqqətin daha da güclənməsinə səbəb olub, anatomlar qarşısında təcrübi təbabətin maraqlarına xidmət edən elmi tədqiqatların aparılması, təşrihin daha incə və detallı metodlarının tətbiqi məsələsini aktuallaşdırıb. Bu kimi tədbirlər də məhz həmin məqsədə xidmət edir. 

Tədbir çərçivəsində həmçinin dünya şöhrətli anatomlar, professor Gürsel Ortuğ və professor doktor Çağatay Barutla keçirilən görüşdə Azərbaycan və Türkiyə anatomlarının birgə fəaliyyətinin yeni aspektlərinə toxunulub, əməkdaşlıq perspektivləri müzakirə edilib.