Azərbaycan Respublikası Dövlət Gömrük Komitəsinin Tibbi Xidmət İdarəsinin Elmi-Təcrübi və Tədris Mərkəzinin, Mərkəzi Gömrük Hospitalının, Dayaq Patronaj xidmətinin və "Seni" brendinin birgə təşkilatçılığı ilə 29 Oktyabr - Ümumdünya İnsultla Mübarizə Gününə həsr edilmiş "İnsultdan sonrakı dövrdə reabilitasiya strategiyası" mövzusunda tədbir keçirilib.
Tədbirdə Mərkəzi Gömrük Hospitalının rəisi Elman Məmmədov açılış nitqi ilə çıxış edərək Ümumdünya İnsultla Mübarizə Gününün tarixi barədə məlumat verib. O, əlamətdar günün bu il “Dəqiqələr həyat xilas edə bilər” şüarı ilə dünyanın 40-dan çox ölkəsində qeyd edildiyini vurğulayıb.
E.Məmmədov insult keçirmiş xəstələrə diaqnostikadan reabilitasiyaya qədər bütün mərhələlərdə ixtisaslaşdırılmış tibbi yardımın göstərilməsinin önəmini qeyd edib. O, təşkil olunmuş tədbirin insultlu xəstələrlə birbaşa işləyən müvafiq ixtisas sahiblərinin mövcud bilik və bacarıqlarının təkmilləşdirilməsinə öz töhfəsini verəcəyinə inamını ifadə edib. E.Məmmədov çıxışının sonunda iştirakçıları müzakirələrdə fəal iştiraka dəvət edib.
Tədbirin elmi hissəsində Mərkəzi Gömrük Hospitalının fizioterapevt-reabilitoloqu Səidə Kərimova “İnsultda əsas reabilitasiya prinsipləri: Mirror terapiya (güzgü terapiyası) və FES (Funksional Elektrik Stimulyasiya)”, Elmi-Tədqiqat Tibbi Bərpa İnstitutunun Kliniki-neyrofizioloji laboratoriyasının böyük elmi işçisi, nevroloq, reabilitoloq Mərziyyə Məmmədova “İnsultdan sonra reabilitasiyanın meyarları və qiymətləndirilməsi. İnsultun reabilitasiyası və insultun ikincili profilaktikası” və Dayaq patronaj xidmətinin həkim məsləhətçisi, anestezioloq-reanimatoloq Seyranə Mirzəyeva “İnsult keçirmiş xəstələrə ev şəraitində qulluğun təşkili: praktik nümunələr” mövzusunda məruzələrlə çıxış edib.
Müxtəlif dövlət və özəl tibb müəssisələrinin fizioterapevt-reabilitoloq, nevropatoloq ixtisaslı həkimlərinin, orta tibb personalı və rezidentlərin iştirak etdiyi tədbirdə təqdimatlardan sonra iştirakçıların sualları cavablandırılıb və aktiv müzakirə sessiyası həyata keçirilib.
200-dək mütəxəssisin distant, 80 nəfər mütəxəssisin əyani iştirak etdiyi tədbir, eyni zamanda, Mərkəzi Gömrük Hospitalının rəsmi feysbuk səhifəsi üzərindən də canlı yayımlanıb.
