Aztibb.az xəbər verir ki, iki il davam edən layihə çərçivəsində Lənkəran rayonunda ana ölümlərinin azaldılması istiqamətində bir sıra qabaqcıl strategiyaların tətbiqi nəzərdə tutulur. Pilot layihə mərkəzləşdirilmiş doğum şöbələri olan bir neçə yerli tibb müəssisəsində həyata keçiriləcək. Layihənin əsas fəaliyyətlərinə tibb personalının potensialın artırılması, klinik protokolların və metodik vasitələrin yenilənməsi üçün tövsiyələrin hazırlanması, eləcə də əhali arasında maarifləndirmə və təşviqat işinin təşkili daxildir.

 

Layihənin icrasına 24 oktyabr 2022-ci il tarixində Lənkəran rayon Perinatal Mərkəzində baş tutmuş açılış tədbiri ilə start verilib. Tədbiri giriş sözü ilə Lənkəran RMX PHŞ-in direktoru Ağabala Kəlbiyev açdı. İclasda BMT-nin Əhali Fondu, İcbari Tibbi Sığorta Dövlət Agentliyi, TƏBİB, Elmi-Tədqiqat Mamalıq və Ginekologiya İnstitutu, İctimai Səhiyyə və İslahatlar Mərkəzi və Respublika QİÇS-lə Mübarizə Mərkəzinin nümayəndələri çıxış ediblər. Layihənin meneceri Könül Qaraşlı tədbir iştirakçılarına layihə haqqında ümumi məlumat verib. Layihənin qrup rəhbəri Elmi-Tədqiqat Mamalıq və Ginekologiya İnstitutunun şöbə müdiri Gülnarə Rzayeva layihə çərçivəsində görüləcək işlər barədə danışıb.

 

Görüləcək işlərin ilk mərhələsində Elmi-Tədqiqat Mamalıq və Ginekologiya İnstitutunun ekspert qrupu Lənkəran rayon Perinatal Mərkəzində və Ailə Sağlamlıq Mərkəzində maddi-texniki təchizat bazasının yoxlanılması, daha sonra isə bu müəssisələrinin tibb heyətinin bilik və bacarıqlarının artırılması istiqamətində silsilə tədbirlər həyata keçirəcək. Layihənin birinci mərhələsi 2022-ci ilin sonuna qədər icra olunacaq.

 

Başlıca məqsədi sözügedən regionda əngəllənə bilən ana ölümlərinin sayının azalmasına nail olmaq olan layihənin icrasına bu sahədə ixtisaslaşmış beynəlxalq ekspertlər rəhbərlik edir. Gələcəkdə layihənin icrasından əldə ediləcək müsbət nəticə və təcrübənin Azərbaycanın digər regionlarında da tətbiqi nəzərdə tutulur.