Tədbirdə çıxış edən ali təhsil ocağının rektoru Elbrus İsayev NDU-nun Tibb fakültəsinin yaranmasında və formalaşmasında məhrum akademik Adilə Namazovanın və onun rəhbərlik etdiyi Azərbaycan Pediatrlar Assosiasiyasının rolundan danışıb. Onların elmi kadrların hazırlanmasında, elmi-praktiki konfransların, seminarların, mühazirələrin mütamadi olaraq təşkilində, tibb kitabxanasının formalaşmasında və lazımi dərsliklərlə təmin edilməsində töhfəsi olduğunu deyib. Rektor universitetdə görkəmli alim, akademik Adilə Namazova adına xüsusi stipendiyanın təsis edildiyini də diqqətə çatdırıb.

 

Elbrus İsayev tanınmış alimlər - Azərbaycan Tibb Universitetinin (ATU) Allerqologiya və İmmunologiya kafedrasının müdiri, professor Lalə Allahverdiyevanı və ATU-nun II Uşaq xəstəlikləri kafedrasının dosenti, Azərbaycan Pediatrlar Assosiasiyasının (APA) prezidenti Təranə Tağı-zadəni tədbir iştirakçılarına təqdim edib.

Sonra çıxış edən Naxçıvan Muxtar Respublikasının Səhiyyə naziri Niyazi Novruzov səhiyyə turizminin dövlət büdcəsinin formalaşmasında rolundan danışıb. O, bu sahədə əsas obyektlərdən olan Duzdağ Fizioterapiya Mərkəzi, Darıdağ Arsenli Su Müalicə və İstirahət Kompleksi və bir sıra müalicəvi bulaqların muxtar respublikanın vizit kartı hesab oluna biləcəyini deyib.

Tədbirdə professor Lalə Allahverdiyeva “Duzdağ Fizioterapiya Mərkəzində postCOVID sindromunun reabilitasiya müalicəsi” mövzusunda məruzəsini təqdim edib. Alim COVID-19 pandemiyasından sonra xəstələrdə postCOVID sindromunun müşahidəsi halları və bu xəstələrin Duzdağ Fizioterapiya Mərkəzində reabilitasiyasının müsbət nəticələri barədə ətraflı məlumat verib.

“Azərbaycanda tibbi bioetikanın tarixi və inkişafı” mövzusunda çıxış edən APA prezidenti Təranə Tağı-zadə isə məruzəsində tibbi təhsil sistemində kliniki bioetikanın tədrisi təcrübəsi və perspektivləri barədə danışıb. Bioetika, normativ etika və deontologiya anlayışlarının elmi izahını verən məruzəçi insanlığın müasir dünyada yaşaması üçün potensial təhlükələrlə əlaqəli olan etik problemlərdən bəhs edib.

Konfransda Naxçıvan Dövlət Universitetinin professor-müəllim heyətinin üzvlərindən Mətləb İbrahimov, Elmar Rzayev, Gültəkin Əliyeva, Nüsrət Həsənov, Etibar Bababəyli və digərləri əldə etdikləri yenilikləri iştirakçıların diqqətinə çatdırıblar.

Naxçıvan Dövlət Universitetinin “tədqiqatçı universitet” statusuna iddialı olduğunu vurğulayan rektor Elbrus İsayev bu sahədə tədqiqatçı alimlərin dünya təcrübəsinə əsaslanan araşdırmalarının mühüm rol oynadığını, tibb təhsilində davamlı inkişafın zəruri olduğunu qeyd edib.

Tədbirdə tibb sahəsində perspektiv inkişaf istiqamətləri, elm sahəsindəki yeniliklər, yeni yanaşmalar və yeni elmi faktlar təqdim olunub.