Oturaq həyat tərzi qeyri-yoluxucu xəstəliklərin artmasına səbəb olur, Ümumdünya Səhiyyə Təşkilatının (ÜST) ehtimalına görə 2030-cu ilə qədər bu səbəbdən xəstələnənlərin sayı 500 milyon arta bilər.

Aztibb.az www.medikforum.ru-ya istinadla xəbər verir ki, təşkilatın məruzəsində alimlərin azhərəkətlilikdən insanların kütləvi şəkildə xəstələnməsini proqnozlaşdırır. Söhbət əsasən hipertoniya və depressiya hallarının artmasından gedir. 2020-ci ildən etibarən bu xəstəliklərə tutulma hallarında artım müşahidə olunur.

ÜST-ün sənədində deyilir ki, “bu yeni halların təxminən yarısı (47 faiz) hipertoniya və 43 faizi depressiya ilə bağlı olacaq. Bundan ən çox iqtisadi ziyan çəkən yüksək gəlirli ölkələr olacaq, çünki fiziki fəaliyyətin azlığı nəticəsində yaranan xəstəliklərin müalicəsi üçün tibbi-sanitariya xərclərinin 70 faizi məhz onların payına düşəcək”.

Mütəxəssislər bu xəstəlikləri qarşısı alına bilən xəstəliklər kimi xarakterizə edirlər. Sağlam həyat tərzi qaydalarına riayət etmək, həmçinin fiziki məşqlər və lazımi həcmdə fiziki aktivlik bu xəstəliklərin effektiv şəkildə qarşısını alır. ÜST ekspertlərinin sözlərinə görə, fiziki hazırlığın əhəmiyyəti COVID-19 pandemiyası ilə ciddi şəkildə təsdiqlənib. Həyatında müntəzəm fiziki fəaliyyət göstərən insanlar koronavirus infeksiyasının səbəb olduğu xəstəliyin öhdəsindən daha yüngül gəlirlər.