Azərbaycan Tibb Universitetinin (ATU) yuxarı kurs tələbələri hər il olduğu kimi, bu il də Türkiyənin nüfuzlu universitetlərində yay təcrübəsi keçiblər. ATU-nun Müalicə-profilaktika, Stomatologiya, İctimai səhiyyə və Əczaçılıq fakültələrinin 256 tələbəsi Türkiyənin 9 (Atatürk, Dokuz Eylül, Ege, Gazi, Hacettepe, İstanbul Universiteti-Cerrahpaşa, Lokman Hekim, Ondokuz Mayıs, Selçuk) universitetində olub, tibbi bilik və bacarıqlarını zənginləşdiriblər.

Aztibb.az xəbər verir ki, bu barədə məlumat verən ATU-nun Beynəlxalq əlaqələr üzrə prorektoru, dosent Orxan İsayev təcrübə prosesinin universitet rəhbərliyinin göstərişi ilə reallaşdırılğını bildirib: “Məlum olduğu kimi, ATU ilə Türkiyənin 30-dan çox universiteti arasında ikitərəfli əməkdaşlıq memorandumu imzalanıb. İmzalanmış memorandumlar çərçivəsində tələbə-müəllim mübadiləsi, birgə elmi-tədqiqat işləri, birgə elmi tədbirlər və digər müvafiq işlər həyata keçirilir. Tələbələrimizin çoxsaylı müraciətlərini nəzərə alan universitetin rəhbərliyi onların Türkiyədə təcrübə keçmələri üçün qərar qəbul edib. Bundan sonra Türkiyə universitetlərinə müraciətlər edilib. Tələbələr iki mərhələdə (iyul-avqust və avqust-sentyabr ayları) və hər biri bir ay olmaqla təcrübə keçiblər. Onlar xəstəxanalarda çoxsaylı xəstələrin müayinə və müalicəsində müşahidəçi qismində iştirak ediblər”.

Prorektor təcrübə prosesinin təşkili işində ATU-nun Beynəlxalq əlaqələr şöbəsinin müdiri, dosent Müşfiq Orucovun yaxından iştirak etdiyini bildirib və onun əməyini yüksək qiymətləndirib.