Ümumdünya Səhiyyə Təşkilatının (ÜST) həyata keçirdiyi layihələr – Avropa İttifaqının (Aİ) maliyyələşdirdiyi Sağlamlıq üçün Həmrəylik Təşəbbüsü və USAID tərəfindən maliyyələşdirilən Azərbaycanda Pandemiyaya Cavab Tədbirləri  ölkə xəstəxanalarının İnfeksiyaların Profilaktikası və Nəzarət (İPN) üzrə 19 məsul şəxsinin və səhiyyə mütəxəssisinin Türkiyədə iştirak etdiyi təkmilləşdirmə proqramı davam edir.

Təkmilləşdirmə proqramının iştirakçıları Ankarada yerləşən daha 3 tibb müəssisəsini ziyarət edərək xəstəxanaların İPN fəaliyyətlərini yerində öyrənmək fürsəti əldə edib.

Aztibb.az xəbər verir ki, Gülhane Təlim və Tədqiqat Xəstəxanası (keçmiş GATA), Ankara Onkologiya Təlim və Tədqiqat Xəstəxanası və 29 May Xalq Xəstəxanasında təcrübə keçən Azərbaycan mütəxəssisləri xəstəxanaların İPN proqramları, İPN komitələrinin fəaliyyətləri, təlim və təhsil məsələləri, tibb bacıları və İPN, tibb tullantılarının idarə olunması və əl gigiyenası kimi geniş təqdimatlarla tanış olub. TƏBİB və Türkiyə Respublikasının Səhiyyə Nazirliyi arasındakı bu texniki əməkdaşlıq Azərbaycanın İPN mexanizminin gücləndirilməsi baxımından böyük əhəmiyyət kəsb edir.