Oktyabrın 10-da ATU-nun I Müalicə-profilaktika fakültəsinin genişləndirilmiş ümumi iclasında universitetin Böyük Elmi Şurasına və Fakültə Elmi Şurasına seçkilər keçirilib.
Tədbirdə ATU-nun Tədris və müalicə işləri üzrə prorektoru, professor Sabir Əliyev çıxış edərək tədris prosesində nizam-intizama riayət etməyin vacibliyinə toxunub. Prorektor qeyd edib ki, bu tədris ilindən etibarən Elm və Təhsil Nazirliyinin təlimatına əsasən universitetdə yeni qaydalar tətbiq olunacaq.
Onun sözlərinə görə, bu il qəbul olunan xarici tələbələrin say çoxluğunu nəzərə alaraq, ingilisdilli bölmələrə və ingiliscə dərs deyən müəllimlərə tələbat da artıb. Bu nöqteyi-nəzərdən hər kafedrada bir neçə müəllimin ingilis dili hazırlığına xüsusi fikir verilməlidir.
"Klinik kafedraların bəzi müəllimlərinin özəl klinikalara getməsi haqqında məlumatlar var. Belə müəllimlər barəsində müvafiq tədbirlər görüləcək. Eləcə də yeni qaydalara görə bəzi kafedralarda birləşmələr və ixtisarlar olsa da, universitet rəhbərliyi imkan daxilində təcrübəli müəllim heyətini saxlamağa çalışıb”.
Professor S.Əliyev yeni tədris ilində tədris-metodik, elmi-tədqiqat işləri,eləcə də universitetin maddi-texniki bazasının möhkəmləndirilməsi haqqında da toplantı iştirakçılarına geniş məlumat verib. Alim bildirib ki, kafedra müdirləri, həmçinin universitetin hər bir əməkdaşı müasir dövrün tələblərinə uyğunlaşmalı və üzərinə düşən vəzifəni lazımınca yerinə yetirməlidir.
Sonra çıxış edən universitetin elmi katibi, professor Nazim Pənahov yeni qaydalar barədə məlumat verib. O, ATU-nun Böyük Elmi Şurasına və Fakültə Elmi Şurasına üzvlük üçün beş illik müddətin başa çatdığını və bu tədris ilində yeni tərkibin müəyyənləşməli olduğunu bildirib.
Daha sonra hər iki şuraya gizli səsvermə keçirilib.
Toplantı iştirakçıları tərəfindən yaradılan hesablama komissiyası səsvermənin nəticələrini elan edib. Nəticələrə əsasən, 18 kafedranı özündə birləşdirən I Müalicə-profilaktika fakültəsindən 12 nəfər ATU-nun Böyük Elmi Şurasının, 41 nəfər isə Fakültə Elmi Şurasının tərkibinə seçilib.
