Gürcüstanın Tbilisi şəhərində “COVID-19: Qazanılmış təcrübə” adlı beynəlxalq konfrans keçirilib.

Konfransda TƏBİB-in Koordinasiya şöbəsinin müdiri Mübariz Ağayev, İxtisaslı tibbi yardım xidmətinin təşkili şöbəsinin müdiri Kəmalə Ağayeva, Sığorta fəaliyyətinin təşkilinə nəzarət şöbəsinin müdiri Qasım Əmrahlı, Bakı Baş Səhiyyə Mərkəzinin İlkin səhiyyə xidmətinin inkişafı departamentinin rəhbəri Gülnarə Yusifova və digər şəxslər iştirak ediblər.

Beynəlxalq tədbir Avropa İttifaqı ilə Gürcüstanın Xəstəliklərə Nəzarət və İctimai Sağlamlıq üzrə Milli Mərkəzinin birgə təşkilatçılığı ilə keçirilib.

Konfrans çərçivəsində qanunvericilik məsələləri, diaqnostika və nəzarət, bioloji tullantıların idarə edilməsi, ictimai səhiyyə sahəsində effektiv kommunikasiya, sanitar nəzarət və risklərin idarəolunması, biotəhlükəsizlik istiqamətində müzakirələr aparılıb.

TƏBİB təmsilçisi Qasım Əmrahlı “COVID-19 pandemiyası zamanı ictimai səhiyyə və effektiv kommunikasiya” mövzusunda ölkəmizin təcrübəsi və əldə etdiyi uğurlu nəticələr barədə təqdimatla çıxış edib.