Məlum olduğu kimi, bu yaxınlarda Nazirlər Kabineti “Xüsusi karantin rejimi dövründə Azərbaycan Respublikasında fəaliyyət göstərən təhsil müəssisələrində tədris və təlim-tərbiyə prosesinin təşkilinin müvəqqəti Qaydaları”nı təsdiq edib.

 

Bu qaydalara əsasən, Azərbaycan Tibb Universitetinin (ATU) rəhbərliyi tərəfindən müvafiq addımlar atılıb, bir sıra işlər görülüb.

 

Aztibb.az xəbər verir ki, ATU-nun II müalicə-profilaktika fakültəsinin dekanı, dosent İsrail Məhərrəmbəyli Normal fiziologiya, Patoloji anatomiya, İnsan anatomiyası və tibbi terminologiya, Şüa diaqnostikası, Tibbi fizika, Patoloji fiziologiya kafedralarında olub, kafedra və tədris hissə müdirləri ilə görüşüb.

 

Görüşdə “onlayn” dərslərin keçirilməsinin vəziyyəti, mövcud çətinliklərin aradan qaldırılması, eyni zamanda, təkrar dinləmə götürmüş tələbələrin cədvəlləri müzakirə olunub. Həmçinin təhsil müəssisələrinə giriş və çıxış zamanı şəxslər (təhsilalanlar, təhsilverənlər və s.) arasında minimum 1,5 metr sosial məsafənin təmin olunması, kafedra əməkdaşlarının qoruyucu vasitələrdən istifadəsi, fərdi təhlükəsizlik qaydalarına nəzarət həyata keçirilib.