Mütəxəssislər tip 2 diabet olma riski ilə gündəlik çay qəbulu arasındakı əlaqəyə diqqət çəkiblər.

Aztibb.az xəbər verir ki, həkim-endokrinoloq Fərhad Burzu bu barədə paylaşım edib.

Həkim bildirib ki, Avropa Diabet Tədqiqatı Assosiasiyasının son ilki toplantısı zamanı mütəxəssislər çay içməyin tip 2 diabet olma riskini azaltdığını iddia ediblər.

İddialara görə, hər gün 4 stəkan və daha artıq çay içən insanlarda, xüsusilə yaşıl çay, oolong və ya qara çay içən insanlarda gündəlik çay içməyən insanlara nisbətən tip 2 diabet olma riski 17% azdır.

Çinin Elm və Texnologiya Universitetinin mütəxəssisi Xiaying Li öz müsahibəsində çayın tərkibindəki xüsusi komponentlərin (polifenollar) qanda qlükoza səviyyəsini azaltdığını bildirib.

2021-ci ildə Çin tərəfindən təşkil olunan, 19 ölkədə 1 milyondan çox insanın iştirak etdiyi Sağlamlıq və Qidalanma sorğusunun nəticələrinə əsasən gündəlik 1 stəkan çay içən insanların tip 2 diabet olma riski 1; 2-3 stəkan çay içənlərdə 0,96; 4 stəkan və daha çox çay içən insanlarda isə 0,84 olaraq qiymətləndirilib.

"Bu araşdırmada təbii ki, sadə çay qəbulundan söhbət gedir. Fərqli şirniyyat və qidalı maddələrlə bərabər istifadə olunaraq çay içilməsi bilavasitə qanda şəkər miqdarını artıracaqdır", - deyə F.Burzu bildirib.