Zoologiya İnstitutunun Tətbiqi Zoologiya Mərkəzinin kiçik elmi işçisi Rəfiqə Qazi Türkiyənin Samsun Baytarlıq Nəzarəti İnstitutunda ezamiyyətdə olub.

İnstitutdan Aztibb.az-a verilən məlumata görə, ezamiyyət müddətində Azərbaycanın Qəbələ rayonunda yerləşən arıçılıq təsərrüfatından götürülmüş bal arısı nümunələrinin PZR (Polimeraz Zəncir Reaksiyası) analizi aparılıb.

Analiz nəticəsində Azərbaycanda ilk dəfə olaraq “Varroa destructor virus-1”, “İsrail arı iflici”, “sacbrood” (Torba bala çürüklüyü virusu), “qara ana arı”, “deformasiya” virusları molekulyar səviyyədə təyin olunub, eyni zamanda, funqal xəstəlik olan “nosema ceranae” aşkarlanıb. Qeyd etmək lazımdır ki, “İsrail arı iflici” virusu və “Varroa destructor virus-1” təhlükəlidir və arıların kütləvi məhvinə səbəb olur. Aparılan təcrübə nəticəsində sadalanan xəstəliklərə qarşı gənc alim tərəfindən tətbiq edilən təbii qida əlavələri müsbət təsir göstərib.