Mərkəzi Gömrük Hospitalında Türkiyənin Təcili Yardım və Pediatrik Reanimasiya Cəmiyyətinin nümayəndələri ilə görüş keçirilib.

Görüşdə Azərbaycan Respublikası Dövlət Gömrük Komitəsinin Tibbi Xidmət İdarəsinin rəis müavini, t.ü.f.d., dosent İsmayıl Əfəndiyev, Mərkəzi Gömrük Hospitalının rəis müavini Rəna Qasımova, pediatr-reanimatoloq Təranə Göyüşova, Dövlət Gömrük Komitəsinin Tibbi Xidmət İdarəsinin Elmi-Təcrübi Tədris Mərkəzinin mütəxəssisi Şəhla Mirzəzadə və digər mütəxəssislər iştirak ediblər.

İsmayıl Əfəndiyev əvvəlcə qonaqlara Azərbaycan Respublikası Dövlət Gömrük Komitəsinin Tibbi Xidmət İdarəsi tərəfindən həyata keçirilən tədbirlər, Mərkəzi Gömrük Hospitalının Reanimasiya və Anestezioloqiya şöbəsinin əldə etdiyi nailiyyətləri və Hospitalın fəaliyyəti barədə məlumat verib.

Daha sonra Türkiyə Təcili Yardım və Pediatrik Reanimasiya Dərnəyinin rəhbəri prof. Dincer Yıldızdaş, Türkiyə Səhiyyə Nazirliyinin Uşaq Sağlamlığı və Uşaq Xəstəlikləri, Pediatrik Təcili Yardım həkimi, prof. Murat Duman və Ankara Universitetinin Uşaq İntensiv Terapiya kafedrasının professoru Tanıl Kendirli Dövlət Gömrük Komitəsinin Tibbi Xidmət İdarəsi və Mərkəzi Gömrük Hospitalı ilə qarşılıqlı əməkdaşlıq məsələləri barədə ətraflı məlumat veriblər.

Həmçinin görüşdə müştərək onlayn formatda konfransların keçirilməsi, o cümlədən Türkiyə və Azərbaycan həkimlərinin birgə elmi-təqdiqat işlərinin hazırlanması, Azərbaycanda Türkiyədən olan həmkarların təcrübəsini tətbiq edərək ustad proqramlarının təşkili və digər məsələlər müzakirə olunub.