Azərbaycan Reanimatoloqlar və Anestezioloqlar Cəmiyyəti, Türkiyə Anestezioloji və Reanimasyon Dərnəyinin birgə təşkilatçılığı, Səhiyyə Nazirliyi və TƏBİB-in dəstəyi ilə “Hilton” otelində “Türkiyə-Azərbaycan anesteziologiya və reanimasiya, ağrı workshop günləri” adlı konfrans keçirilib.
Əvvəlcə şəhidlərimizin əziz xatirəsi bir dəqiqəlik sükutla yad edilib, Azərbaycan və Türkiyənin Dövlət Himnləri səsləndirilib.
Sonra İradə Səlimova və Büllur Dağçının aparıcılığı ilə konfrans öz işinə başlayıb.
Tədbirdə giriş nitqi ilə çıxış edən Azərbaycan Reanimatoloqlar və Anestezioloqlar Cəmiyyətinin (AzRAC) sədri, professor İsfəndiyar İsmayılov konfransın əhəmiyyətini vurğulayıb. O, tədbirin keçirilməsinə lazımi dəstək verdiyi üçün Səhiyyə Nazirliyinə, TƏBİB-ə, o cümlədən Türkiyə Anestezioloji və Reanimasyon Dərnəyinin (TARD) rəhbəri, professor Meral Kanbaka təşəkkür edib.
"Türkiyədən gələn nümayəndə heyəti maraqlı məruzələrlə çıxış edəcək, diskussiyalar aparacaq, master-klaslar keçəcək", - deyə bildirən AzRAC sədri tədbirdə ən son yeniliklərdən, mühüm nailiyyətlərdən bəhs olunacağını söyləyib.
Sonra TARD-ın rəhbəri, professor Meral Kanbak çıxış edərək aktual məsələləri özündə əks etdirən bu cür tədbirlərin mütəmadi keçirilməsinin, təcrübə və bilik mübadiləsi aparılmasının qardaş ölkələrin mütəxəssisləri üçün əhəmiyyət kəsb etdiyini bildirib. Professor tədbirin gənc mütəxəssislərin praktik təcrübəsinin artırılması və təkmilləşdirilməsində önəmli rol oynayacağını diqqətə çatdırıb.
Daha sonra çıxış edən Türkiyənin Azərbaycandakı səfiri Cahid Bağçı iki qardaş ölkə arasında iqtisadi, mədəni, təhsil, tibb və digər sahələrdə sıx əlaqələrin olduğunu və bu əlaqələrin günü-gündən daha da inkişaf etdirildiyini vurğulayıb, konfransın işinə uğurlar arzulayıb.
Milli Məclisin Səhiyyə komitəsinin sədri, akademik Əhliman Əmiraslanov isə çıxışında Azərbaycan və Türkiyə tibb işçilərinin birgə tədbirlər keçirməsinin artıq ənənə halını aldığını bildirib: “Anestezioloq-reanimatoloqların bu birgə konfransı təbabətin ən aktual problemlərindən birinə həsr olunub. Biz ilk konfransımızı 10 il öncə Azərbaycan Tibb Universitetində keçirmişdik. Bugünkü tədbirin mövzusu barədə demək istəyirəm ki, COVID-19 dönəmində anestozologiyanın təbabətdə nə dərəcədə vacib rol oynadığı bir daha göründü. İnkişaf etmiş Avropa ölkələrində COVID-19 dönəmində səhiyyə sistemi çökdü. Amma qardaş Türkiyədə və ölkəmizdə xəstələrin sayının kifayət qədər yüksək olmasına baxmayaraq, burada iştirak edən mütəxəssislərin də sayəsində onları intensiv terapiya şöbələrində yerləşdirə və müalicəsini apara bildik. Nəticədə minlərlə, on minlərlə insan həyatı xilas edildi”.
Akademik Əhliman Əmiraslanov alqologiya sahəsində yaşanan problemə də toxunaraq, ölkəmizdə bu sahəyə ehtiyacı olan insanların sayının günbəgün artdığını, lakin həmin insanların xidmətində dayanacaq kifayət qədər mütəxəssisin olmadığını bildirib. O, yaxın illərdə türkiyəli mütəxəssislərin köməyi ilə ölkəmizdə bu sahədə gənc mütəxəssislərin yetişəcəyinə ümidvar olduğunu qeyd edib.
Səhiyyə nazirinin müavini, dosent Nadir Zeynalov bu günümüzdə keçirilən mürəkkəb cərrahiyyə əməliyyatlarının uğurunun anesteziologiya sahəsi ilə bilavasitə bağlı olduğunu bildirib.
Pasiyentlərin intensiv terapiya nəticəsində qısa zamanda ayağa qalxması və sağlamlığına qovuşmasının anesteziologiya ilə əlaqəsinə diqqət çəkən nazir müavini, konfransın proqramına aktual problemlərə toxunan məruzələrlə yanaşı, praktik təlimlərin də salınmasını təqdirəlayiq hal kimi qiymətləndirib. Yerli mütəxəssisləri bu fürsətdən yararlanmağa dəvət edən Nadir Zeynalov konfrans iştirakçılarına uğurlar arzulayıb.
Tədbirdə, həmçinin TİKA-nın koordinatoru Fatih Yılmaz, TƏBİB-in şöbə müdiri Kəmalə Ağayeva, Milli Məclisin Səhiyyə komitəsinin sədr müavini, professor Rəşad Mahmudov, İcbari Tibbi Sığorta üzrə Dövlət Agentliyinin Tibbi planlama departamentinin rəhbəri Hikmət İbrahimli və başqaları çıxış edərək bu sahədəki nailiyyətlər və bəzi çatışmazlıqlardan bəhs ediblər.
