Aztibb.az xəbər verir ki, Türkiyə Respublikası Reabilitasiya və Fizioterapiya üzrə Xəstəxanalar Şəbəkəsi olan "Romatem Hospitals" şirkəti ilə əməkdaşlıq çərçivəsində bir neçə nəfərdən ibarət mütəxəssis heyəti Agentliyin reabilitasiya mərkəzlərində fəaliyyətə başlayıblar.

 

Təcrübəli mütəxəssislər Bakı şəhərində yerləşən reabilitasiya müəssisələrində əlilliyi olan şəxslərin bərpa müalicəsi prosesinə cəlb olunublar.

 

Xatırladaq ki, ötən il Dövlət Tibbi-Sosial Ekspertiza və Reabilitasiya Agentliyi ilə “Romatem” şirkəti arasında əməkdaşlığa dair memorandum imzalanıb.

 

Sənəddə reabilitasiya xidmətlərinin effektiv və səmərəli təşkili, bu sahədə ixtisaslaşmış kadrların yetişdirilməsi sahəsində əməkdaşlıq, reabilitasiya sahəsində tətbiq olunan modern yanaşmalara dair məlumat və təcrübə mübadilələrinin həyata keçirilməsi nəzərdə tutulub.