Ürək-damar xəstəlikləri dünyada geniş yayılmaqdadır. İnkişaf etmiş ölkələrdə belə, ürək xəstəlikləri ölümə səbəb olan xəstəliklər sırasında ilk yerlərdə gəlir. Amma 15-20 il ərzində farmakoterapiya, cihaz terapiyasında böyük irəliləyişlər əldə olunub. Kəskin miokardın qarşısı alınır, vaxtında xəstəyə müdaxilə olunur ki, ürək çatışmazlığı yaranmasın.

Aztibb.az xəbər verir ki, bu barədə Nərimanov Tibb Mərkəzinin kardioloqu Lalə Həsənova bildirib. 

Həkim bildirib ki, son illər şəkərli diabet xəstəliyi geniş yayılıb. Şəkər xəstələrində ağrı simptomları olmadığına görə həmin xəstələr vaxtında həkimə müraciət etmirlər. Bu da nəticədə ürək çatışmazlığına gətirib çıxarır. İndiki həyat tərzi çox stress yaradır. İnsanlarda stres bir risk faktoru olaraq yüksək qan təzyiqinə səbəb olur. Bu da aritmiyalara, miokard infarktına və ürək çatışmazlığına gətirib çıxarır.

"Ürək qan-damar xəstəliklərinin, miokard infarktının olmaması üçün gün ərzində hər bir insan 5-6 km məsafəni qət etməlidir, pəhrizə fikir verməlidir, yağlı qidalardan və imkan daxilində stressdən uzaq olmalıdır. Bütün bunlara və vaxtlı-vaxtında müalicələrə əməl edilsə, ürək qan-damar xəstəliklərindən uzaq olmaq mümkün olar bilər".