Aztibb.az-a TƏBİB-dən verilən məlumata görə, 17 nömrəli Birləşmiş Şəhər Xəstəxanasının (BŞX) Hemodiaiz şöbəsində xəstə qəbuluna başlanılıb.

 

Mərkəzdə həftədə 3 dəfə və hər biri dörd saat olmaqla son mərhələ böyrək çatışmazlığı olan xəstələrə hemodializ proseduru həyata keçiriləcək.

 

Qeyd edək ki, düzgün işləyən böyrəklər orqanizmdə əlavə maye və zərərli maddələrin yığılmasının qarşısını alır. Onlar, həmçinin qan təzyiqini idarə etməyə və qanda elektrolit səviyyəsini tənzimləməyə kömək edir, kalsiumun mənimsənilməsini yaxşılaşdıran D vitaminini aktivləşdirir.

 

Böyrəklər xəstəlik və ya zədə səbəbindən bu funksiyaları yerinə yetirə bilmədikdə, dializ orqanizmin mümkün qədər normal işləməsinə kömək edə bilər, lakin bu böyrək çatışmazlığının tam həlli deyildir.

Bədəndə toplanmış həyati təhlükə yaradan tullantılar və toksinlərin xaric olunması müalicə edilmədikdə ömrü uzatmaq üçün dializ müalicəsi və ya böyrək nəqli lazımdır.