Azərbaycanlı onkoloq Nərmin Talıbova Almaniyanın Ulm Universitet Xəstəxanasında fəaliyyətə başlayıb.

 

Aztibb.az xəbər verir ki, bu barədə Almaniya-Azərbaycan Radioloji və Neyroradioloji Cəmiyyətinin sədri, tibb elmləri doktoru Nuran Abdullayev sosial şəbəkədə məlumat paylaşıb.

 

Məlumat üçün bildirək ki, Almaniyanın Ulm Universitet Xəstəxanası Almaniyada “Top-25”ə daxil olan universitet xəstəxanası və Almaniyanın "Top-14"ə daxil olan nüfuzlu xərçəng mərkəzidir.

 

Qeyd edək ki, Nərmin Talıbova 2006-ci ildə Türkiyə Diyanət Vəqfi Bakı Türk Litseyini bitirərək Azərbaycan Tibb Universitetinin Müalicə-profilaktika fakültəsinə daxil olub. 2011-ci ildə Tibb Tələbələri Assosiasiyasının Beynəlxalq Federasiyasının (İFMSA-İnternational Federation of Medical Students Association) beynəlxalq tələbə mübadiləsi proqramı çərçivəsində Portuqaliyanın Santa Maria Xəstəxanasında 1 aylıq təcrübə mübadiləsi keçib. 2012-ci ildə universiteti bitirən Nərmin Talıbova Milli Onkologiya Mərkəzində “onkologiya”  ixtisası üzrə rezidentura təhsili alıb. Rezidentura dövründə 3 aylıq  Almaniyanın Yena Universitet Klinikasının Hematologiya və tibbi onkologiya şöbəsində, həmçinin Türkiyənin Neolife Xərçəng Mərkəzində kurs keçib.

 

O, 2016-cı ildə Amerika Klinik Onkologiya Cəmiyyətinin ”Beynəlxalq İnkişaf və Təhsil” mükafatını qazanaraq 2 həftə Amerika Birləşmiş Ştatlarının Çikaqo və Kolumbus şəhərində olub, Ohia Universitetinin James Xərçəng Mərkəzində professor Riçard Qoldberq (qastrointestinal şişlər üzrə dünyada tanınmış alim) və Dr. İvana Efeberanın rəhbərliyi altında təcrübə mübadiləsi keçib.

 

Nərmin Talıbova 2018-ci ildə Avropa Onkologiya Məktəbinin (ESO-European School of Oncology) təşkil etdiyi “Süd vəzi xərçəngi üzrə sertifikasiya” proqramına ölkələr arasında  qrant qazanaraq bir il ərzində Almaniya, Avstriya, Portuqaliyada keçirilən seminarlarda iştirak edib, Almaniya Ulm Universitetinin Xərçəng Mərkəzində təcrübə mübadiləsində olub.