“Həkimlərimizi tanıyaq!” rubrikası təqdim edir: Anestezioloq-reanimatoloq Şahin Mazanov

02.09.2022 12:11

“Həkimlərimizi tanıyaq!” rubrikamızda Sizlərə ən ağır xəstələrlə iş təcrübəsi qazanmış, xəstələrə qarşı xoş rəftarı ilə seçilən anestezioloq-reanimatoloq Şahin Mazanovu təqdim edirik.

Şahin Mazanov 2004-cü ildə Azərbaycan Tibb Universitetinin Pediatriya fakültəsini bitirib, 2004-2005-ci illərdə Ə.Qarayev adına Uşaq Xəstəxanasında internatura təhsili alaraq anestezioloq-reanimatoloq kimi formalaşıb. O, 2008-2018-ci illərdə müxtəlif dövlət və özəl tibb müəssisələrində ürək-damar cərrahiyəsi və reanimasiya şöbəsinin müdiri, reanimatoloq kimi işləyib.

Hazırda Mərkəzi Gömrük Hospitalının Anesteziologiya və Reanimasiya şöbəsində ümimi anesteziya, regional anesteziya (spinal və epidural), traxeyanın inturbasiyası və eksturbasiyası, mərkəzi damarlara kateterin qoyulması, invaziv və non-invaziv monitorinq, ağciyərlərin invaziv və non-invaziv ventilasiyası, traxeostomanın açılması, ağrı terapiya pompasının tətbigi (PCA), lumbaı punksiya və onurğa beyin mayesinin alınması, bronxoskopiya ilə bronxların lavajı, defibrilasiya və kardioversiya, ürəkdaxili inyeksiyalar və digər prosedurları həyata keçirir.

Təcrübəli anestezioloq-reanimatoloq daim öz üzərində çalışır, dünya mətbuatında ən yeni nailiyyyətləri izləyərək praktikada tətbiq edir, Türkiyə, İran və digər ölkələrdə keçirilən konfranslarda ölkəmizi təmsil edir.

O, 2009-cu ildə Bakıda Türk Kardioloji Dərnəyinin və Azərbaycan Kardiovaskulyar Cərrahiyyə Cəmiyyətinin təşkil etdiyi “Kardiologiya və exokardioqrafiya” kursunda, 2011-ci ildə Naxçıvan şəhərində Naxçıvan Muxtar Respublikası Səhiyyə Nazirliyi tərəfindən təşkil edilmiş “Ürək xəstəliklərinin bu günü və gələcəyi” IV Regional Beynəlxalq elmi-praktiki konfransda, 2019-cu ildə Azərbaycan Tibb Universiteti tərəfindən ilə keçirilən “Pediatrik reanimasiya və təcili pediatrik yardım üzrə təlim kursu"nda, 2019-cu ildə Azərbaycan Respublikası Səhiyyə Nazirliyi və Elmi-Tədqiqat Pediatriya İnstitutunun təşkilatçılığı ilə keçirilən “Neonatologiya üzrə Azərbaycan-Türkiyə 3-cü Beynəlxalq təlim kursu"nda iştirak edib. Həmçinin 2018-ci ildə İran İslam Respublikasının Urmia şəhərində Urmia Universitetinin təşkilatçılığı ilə gerçəkləşən elmi konfransda “Minimal invaziv cərrahiyyə və yeni konseptlər” mövzusunda mühazirə ilə çıxış edib.

Şahin Mazanov 2019-cu ildən Mərkəzi Gömrük Hospitalının Anestezioloiya və reanimasiya şöbəsində anestezioloq-reanimatoloq vəzifəsində çalışır.