Mərkəzi Gömrük Hospitalının Travmatologiya şöbəsinin rəisi, travmatoloq-ortopedi, tibb üzrə fəlsəfə doktoru Ramin Rzayev 25-27 avqust 2022-ci il tarixlərində Macarıstanın paytaxtı Budapeşt şəhərində ağrı probleminə həsr olunmuş XI Beynəlxalq konqresdə iştirak edib. Dayaq-hərəkət sistemində olan ağrı sindromuna həsr edilmiş konqresdə ağrı sindromuna müasir yanaşmalar, müasir konservativ müalicələr, bəzi hallarda cərrahi müdaxilələr haqqında geniş məlumat verilib və məruzələr edilib.

Aztibb.az xəbər verir ki, Ramin Rzayev tədbirin travmatologiyaya aid olan hissəsində - dayaq-hərəkət sistemi, bel, bud-çanaq, diz oynaqlarında olan ağrı mövzusunda təqdim edilmiş məruzələri dinləmiş, dünyanın aparıcı tibb müəssisələrinin nüfuzlu alimlərinin ağrının idarəedilməsi haqqında çıxışları ətrafında müzakirələrdə fəal iştirak edib.

Qeyd edək ki, beynəlxalq konqres 3 gün davam etmiş, bu müddət ərzində orada fəaliyyət göstərən sərgi zalında qonaqlara regenerativ tibb, neyromodulyasiya və xroniki ağrılar sahəsində ən yaxşı işlər təqdim edilmişdir. Tədbirdə dünyanın müxtəlif ölkələrindən: ABŞ, Almaniya, Türkiyə, Hollandiya, Braziliya, Belçika, İrlandiya, İspaniya, Tayvan, Meksikadan gəlmiş travmatoloq-ortopedlər, neyrocərrahlar, nevropatoloqlar, fizioterapevtlər, alqoloqlar və digər yüksəkixtisaslı mütəxəssislər iştirak ediblər.