Avqustun 26-da Genetik Ehtiyatlar İnstitutunun (GEİ) baş direktoru AMEA-nın müxbir üzvü Zeynal Əkpərov və Pakistanın Punjab Universitetinin Molekulyar Biologiya Mükəmməllik Mərkəzinin direktoru professor Kausar Maliki elm, təhsil və texnologiya sahəsində əməkdaşlıq müqaviləsi imzalayıblar.
GEİ-dən Aztibb.az-a bildirilib ki, müqaviləyə əsasən, hər iki müəssisə tədqiqat və təhsil proqramlarının mübadiləsi, yeni təhsil proqramlarının hazırlanması, konfrans və seminarların keçirilməsi, yerli və beynəlxalq elmi tədqiqat layihələrinin işlənilməsi, magistrant, doktorant, eləcə də professor-müəllim heyətinin mübadiləsi, birgə magistrant və doktorant hazırlığı, yüksək texnologiyalardan istifadə etməklə birgə tədqiqatların aparılması, yeni bitki sortlarının yaradılması və beynəlxalq məqalələrin hazırlanması sahələrində əməkdaşlıq edəcək.
Zeynal Əkpərov qeyd edib ki, GEİ-nin Elm və Təhsil Nazirliyinin tərkibinə verilməsi nəticəsində dünyanın tanınmış universitetləri ilə elm və təhsil sahəsində əməkdaşlığın genişləndirilməsi, eləcə də yüksəkixtisaslı kadrların hazırlanması sahəsində ikili diplom proqramlarının yaradılması üzrə geniş imkanlar açılıb. Bu imkanlardan istifadə etməklə institutda təhsillə bağlı fəaliyyətlər daha da genişləndiriləcək, magistr və doktorant hazırlığı sahəsində dünyanın yüksək reytinqli universitetlərinin təcrübəsindən geniş istifadə ediləcək, beynəlxalq təhsil proqramlarına qoşulmaq üçün addımlar atılacaq, eləcə də Pakistanın Punjab Universiteti ilə biologiya elminin müasir istiqamətlərində ikili magistr və doktorluq proqramlarının hazırlanması həyata keçiriləcək.
Z.Əkpərov müqavilənin planlaşdırılan sahələrdə elmi əməkdaşlığın güclənməsinə təkan verəcəyinə əminliyini ifadə edib.
Professor K.Maliki GEİ-də mövcud olan müasir elmi infrastrukturu, kadr potensialını, aparılan tədqiqatları, əldə edilən elmi nəticələri, eləcə də təhsil sahəsində institutun fəaliyyətini yüksək qiymətləndirib. Əlavə edib ki, hazırda İslam İnkişaf Bankının dəstəyi ilə Genetik Ehtiyatlar İnstitutu ilə birgə həyata keçiriləcək layihə çərçivəsində əməkdaşlıq əlaqələri daha da genişləndiriləcək. K.Maliki imzalanan əməkdaşlıq müqaviləsinin elm və təhsil sahəsində ciddi nailiyyətlərin əldə olunmasına şərait yaradacağına inamını ifadə edib. O, Molekulyar Biologiya Mükəmməllik Mərkəzinin professor-müəllim heyətinin elm və təhsil sahəsində GEİ ilə həvəslə əməkdaşlıq etmək niyyətində olduğunu diqqətə çatdırıb.
