Müstəqil Dövlətlər Birliyinin mənzil-qərargahında vərəm üzrə İşçi qrupunun birinci iclası keçirilib. Həmin qrup İqtisadi Şurasının qərarı ilə MDB-nin iştirakçı dövlətlərinin HİV/AİDS, vərəm və malyariya problemləri üzrə Əlaqələndirmə Şurası yanında yaradılıb. 

Aztibb.az xəbər verir ki, İşçi qrupu MDB-nin iştirakçı dövlətlərinin 2020–2024-cü illərdə vərəmin yayılmasının qarşısının alınması üzrə Birgə Fəaliyyət Planının icrası üzrə əsas koordinator olacaq.

Görüş iştirakçıları MDB dövlətlərində vərəm əleyhinə xidmətin təşkili ilə bağlı yanaşmaları müzakirə ediblər. Birlik ölkələrində vərəm əleyhinə xidmət sistemlərinin və qarşıya qoyulan vəzifələrin həllinin əsasən oxşar olduğu müəyyən edilib. Eyni zamanda, ekspertlərin fikrincə, daha ətraflı müzakirə və işlənmə tələb edən fərqlər var.

Bundan əlavə, ekspertlərə Birlik dövlətlərində 2020-ci il üzrə vərəm ilə bağlı statistik təhlil təqdim edilib. Sənəddə qeyd edilib ki, göstərilən dövr ərzində MDB ölkələrində 77 min nəfərdə vərəmə yoluxma halı qeydə alınıb. Bu rəqəm keçən il qeydə alınan rəqəmdən daha azdır. Müalicə olunan insanların da sayı azalıb, lakin bununla belə ölüm hallarının sayı artıb, bu da COVID-19 pandemiyası və onunla bağlı məhdudiyyətlərlə izah olunur – insanlar müayinə olunmaq və ya tibbi yardım almaq imkanına malik olmayıb. COVID-19 pandemiyası qlobal səviyyədə vərəmlə mübarizədə əldə edilən nəticələrə ciddi təsir edib: 10 ildən çox müddətdə ilk dəfə olaraq bu xəstəliklə bağlı ölüm hallarının göstəriciləri artıb.

İşçi qrupun üzvləri MDB-nin iştirakçı dövlətlərinin 2020-2024-cü illərdə vərəmin yayılmasının qarşısının alınması üzrə Birgə Fəaliyyət Planının icrası ilə bağlı məlumatlandırılıblar.