COVID-19 kontekstində laboratoriya şəbəkəsinin gücləndirilməsinə davamlı dəstək verilməsi məqsədilə Səhiyyədə Fövqəladə Hallar Proqramının Cənubi Qafqaz üzrə Mərkəzinin laboratoriya üzrə eksperti Dr. Radu Kojakaru və Ümumdünya Səhiyyə Təşkilatının (ÜST) ölkə ofisinin eksperti Dr. Cəvahir Süleymanova tərəfindən keçirilən “Laboratoriyaların tibbi tullantılarının idarə edilməsi” mövzusunda təlim kursları davam edir.

Aztibb.az xəbər verir ki, Bərdədə baş tutan təlimlərdə TƏBİB-in məsul əməkdaşı Ramin Burcəliyev, aidiyyəti qurumların təmsilçiləri, sözügedən rayon və yaxın bölgələrdən laboratoriya əməkdaşları və müxtəlif xəstəxanalardan tibb işçiləri iştirak edib.

Təlim zamanı laboratoriyada yaranan tullantıların müxtəlif kateqoriyaları, müvafiq risklər və tullantıların idarə edilməsi prosesi, o cümlədən seqreqasiya, müvəqqəti saxlama, daşınma, zərərsizləşdirmə və təkrar emalı barədə geniş məlumat verilib.

Məlumat üçün qeyd edək ki, layihə ÜST, Səhiyyə Nazirliyi və TƏBİB-in birgə əməkdaşlığı çərçivəsində həyata keçirilir.