Avqustun 5-dək davam edəcək sərt karantin rejimi dövründə Bakı metropoliteninin bağlı qalması məsələsinə aydınlıq gətirilib.

Aztibb.az xəbər verir ki, Azərbaycan Televiziyasında yayımlanan “Hədəf” verilişində danışan Prezidentin köməkçisi, Prezident Administrasiyası Xarici siyasət məsələləri şöbəsinin müdiri Hikmət Hacıyev ictimai nəqliyyatla bağlı məhdudiyyətlərin səbəbini belə izah edib:

“Məhdudiyyətlərə əsasən Bakı metropolitenində sərnişindaşıma fəaliyyəti tamamilə dayandırılır. Xüsusi karantin rejiminin sərtləşdirildiyi şəhər və rayonlarda həftəsonları ictimai nəqliyyatın hərəkətinə son qoyulur".

Şöbə müdiri bildirib ki, qarşıdan gələn uzadılma dövründə də ictimai nəqliyyatın fəaliyyəti dayandırılacaq. Bakı metropoliteninin fəaliyyətinin dayandırılması metronun qapalı məkan olması və şaxta prinsipi əsasında fəaliyyət göstərməsi ilə əlaqədardır. Onun ventilyasiya sistemi də mərkəzləşmiş qaydadadır. Ventilyasiya sisteminə virus düşdüyü halda bütün sistemi yoluxdura bilər. Onun hava hərəkəti vasitəsilə digər məntəqələrə yayılması mümkün ola bilər.

O, qeyd edib ki, metropolitenin fəaliyyətinin dayandırılması təkcə Azərbaycanda həyata keçirilmir. Digər ölkələrdə də, koronavirusa qarşı mübarizə tədbirləri çərçivəsində ictimai nəqliyyata tətbiq olunan məhdudiyyətlər ilk metropolitenə tətbiq olunur.