Hemofiliyalı Xəstələrin Respublika Assosiasiyasının təşkilatçılığı ilə "Müalicənin əlçatanlığının hamı üçün olmasına doğru" adlı hemofiliya məktəbinin növbəti təlimi keçirilib.
Aztibb.az xəbər verir ki, təlim "Laxtalanma pozğunluğundan əziyyət çəkən insanların sosial müdafiəsi və əlillik sahəsində yeni meyarların tətbiqi" mövzusuna həsr olunub.
Təlimlərdə məruzəçi Hemofiliyalı Xəstələrin Respublika Assosiasiyasının sosial məsələlər üzrə koordinatoru Nurəddin Abdullayev yeni meyarlarla əlilliyin təyin olunması haqda danışıb. Bundan başqa, ortopediya, reabilitasiya, sanator kurort, istirahət və özünə məşğulluq sahələrinə dövlət tərəfindən göstərilən qayğı barədə pasiyentlərə və kiçik yaşlı uşaqların valideynlərinə məlumat verilib.
Qeyd edək ki, təlimlərə laxtalanma pozğunluğundan əziyyət çəkən vətəndaşlardan başqa, Kistik Fibroz Xəstəliyinə Yardım İctimai Birliyinin sədri Səadət Bayramova və SMA xəsteliyindən əziyyət çəkən uşaqların valideynləri də qatılıblar.
