İşçilərin sağlamlığının qorunması və möhkəmləndirilməsi, onların müalicəsinin təşkili Azərbaycan Həmkarlar İttifaqlarının əsas funksiyalarından biri hesab olunur. Bu məqsədlə Azərbaycan Həmkarlar İttifaqları Konfederasiyasının (AHİK) 8 sanatoriyası və bir müalicə pansionatı fəaliyyət göstərir. Sanatoriyalardan 6-sı ilboyu, 2-si isə mövsümi işləyir. Hər il həmkarlar ittifaqlarının minlərlə üzvü yollayışlarla təmin edilir, onların normal müalicəsi üçün hər cür  şərait yaradılır.

Avqustun 9-da AHİK sədri Səttar Möhbalıyev “Şıx”, “Abşeron”, “Günəşli”, “Bilgəh” sanatoriyalarına, eləcə də yeni tikilməkdə olan “Şəki” və təmirə dayanmış “Xəzər” sanatoriyalarına baş çəkib, buradakı vəziyyətlə tanış olub.

Səttar Möhbalıyev sanatoriyalarda müalicə alan vətəndaşlarla görüşüb. Pasiyentlər onlara göstərilən diqqət və qayğıdan razı qaldıqlarını deyərək, müalicənin və istirahətin yüksək səviyyədə təşkil olunduğunu qeyd ediblər.

AHİK sədri, həmçinin istirahət edənlərin təkliflərini dinləyib. O, sanatoriya rəhbərlərinə xidmətlərin daha yüksək səviyyəyə qaldırılması və yaranan hər hansı bir problemin tezliklə həll olunması üçün tövsiyə və tapşırıqlarını verib.