Mərkəzi Gömrük Hospitalının mama-ginekoloqu Böyük Britaniyada təcrübə mübadiləsində iştirak edir
10.08.2022 09:10
Mərkəzi Gömrük Hospitalının mama-ginekoloqu Sədi Allahverdiyev Böyük Britaniyanın Birmingem Qadın və Uşaq Hospitalında təcrübə mübadiləsində iştirak edir.
 
Aztibb.az xəbər verir ki, Sədi Allahverdiyevin ezamiyyətinin məqsədi Hospitalın Qadın və Uşaq Mərkəzinin və Mama-ginekologiya şöbəsinin iş fəaliyyətinin təşkili prinsipləri, doğuşayardım işində Böyük Britaniya təcrübəsi, o cümlədən ginekoloji əməliyyatların icrasında ən son tibbi yeniliklərin tətbiqi ilə tanış olmaqdadır.
 
Sədi Allahverdiyevin Birmingem Qadın və Uşaq Hospitalının rəhbərliyi ilə görüşü də planlaşdırılmışdır. Görüşdə Mərkəzi Gömrük Hospitalı ilə Birmingem Qadın və Uşaq Hospitalı arasında qarşılıqlı əlaqələrin inkişafı, mama-ginekologiya sahəsində elmi tədbirlərin təşkili, yerli və beynəlxalq mütəxəssislərarası təcrübə mübadiləsinin təşkili və digər məsələlərin müzakirəsi nəzərdə tutulub.
 
Mərkəzi Gömrük Hospitalında çalışan həkimlərin davamlı tibbi təhsil ehtiyaclarının təmin edilməsi və beynəlxalq təcrübədən yararlanmaları üçün mütəmadi olaraq təcrübə proqramları və digər zəruri tədbirlər həyata keçirilməkdədir.
 
Qeyd edək ki, Böyük Britaniyanın Birmingem Qadın və Uşaq Hospitalının həkimi, Mama-ginekoloqların Kral Kollecinin üzvü, tibb üzrə fəlsəfə doktoru, həmyerlimiz Fidan İsrafil-Bəyliyə bu layihənin həyata keçirilməsinə və təşkilatı məsələlərə dəstək göstərib.