25.07 - 05.08.2022 tarixləri ərzində Mərkəzi Gömrük Hospitalında fəaliyyət göstərən könüllü gömrükçülər kargüzarlıq və təqdimat hazırlama bacarıqlarının inkişaf etdirilməsinə dair təlimlərə cəlb olunublar. Dövlət Gömrük Komitəsinin Tibbi Xidmət İdarəsinin Elmi-Təcrübi və Tədris Mərkəzi tərəfindən təşkil olunan təlimlər Dövlət Gömrük Komitəsinin Tibbi Xidmət İdarəsinin Sanitar–Karantin Xidmətinin kargüzarı Vüsalə Ağayeva və Mərkəzi Gömrük Hospitalının marketinq mütəxəssisi Fərid İsrafilzadə tərəfindən həyata keçirilib.

 

Aztibb.az xəbər verir ki, təlimlər zamanı könüllü gömrükçülər ofis proqramları vasitəsilə sənədlərin hazırlanması zamanı diqqət edilməli vacib məqamlar, cədvəllərin, diaqram və qrafiklərin qurulması, hesablama və digər zəruri əməliyyatların həyata keçirilməsi, o cümlədən təqdimat hazırlayarkən slaydların yaradılması, slaydlararası keçidlərin tənzimlənməsi və digər mövzulara dair ilkin biliklərə yiyələniblər.

 

Təlimlər sual-cavab sessiyaları vasitəsilə interaktiv şəkildə həyata keçirilib. Təlimlərin sonunda könüllülərin biliklərinin qiymətləndirilməsi məqsədilə yekun qiymətləndirmə sessiyası təşkil olunub. Qiymətləndirmə zamanı könüllülər tərəfindən hazırlanmış təqdimatlar dinlənilib və onlara müvafiq tövsiyələr verilib.

 

Qeyd edək ki, Mərkəzi Gömrük Hospitalında fəaliyyət göstərən könüllülərin Hospitalın müxtəlif şöbələri daxilindəki fəaliyyətləri ilə yanaşı təlimlərə cəlb olunma prosesləri də mütəmadi olaraq həyəta keçiriləcək.