Məlumdur ki, Prezident İlham Əliyevin müvafiq sərəncamlarına əsasən, bir qrup səhiyyə işçisi “Tərəqqi” medalı və fəxri adlarla təltif edilib. Azərbaycan Respublikasında səhiyyə sahəsində səmərəli fəaliyyətlərinə görə Abdurahmanov Mehrab Nəhməd oğlu, Əliyeva Nailə Həsən qızı, İsmayılov Hikmət İbrahim oğlu, Pirəliyeva Həqiqət Novruz qızı və Rəhimov Afiq Allahverdi oğlu “Tərəqqi” medalına, Qədirova Nuriyə Baba qızına “Əməkdar həkim” fəxri adına layiq görülüb.

Səhiyyə Nazirliyində ölkə başçısının sərəncamı ilə təltif edilən tibb işçilərinə medal və fəxri adların təqdim edilməsi mərasimini keçirib.

Toplantıda səhiyyə naziri Teymur Musayev təltif edilmiş səhiyyə işçilərini təbrik edib. O, mükafatlanan şəxslərin hər birinin səhiyyə sahəsində uğurlarının, naliyyətlərinin olduğunu diqqətə çatdırıb.

Qeyd olunub ki, son illər Azərbaycanda səhiyyənin inkişafı ilə bağlı həyata keçirilən dövlət proqramları, layihələr, inşa olunan tibb müəssisələri, onların ən müasir avadanlıqla təchiz olunması Prezident İlham Əliyevin və Birinci vitse-prezident Mehriban xanım Əliyevanın bu sahəyə göstərdiyi böyük diqqət və qayğının bariz nümunəsidir.

Daha sonra səhiyyə naziri Teymur Musayev mükafatları təqdim edib və mükafatlanan şəxslərə gələcək fəaliyyətlərində uğurlar arzulayıb.