Peşəkar həkimlərimizi tanıyaq! - Tibb üzrə fəlsəfə doktoru Elvin Əzizov - aztibb.az AZƏRBAYCANIN SƏHİYYƏ XƏBƏR PORTALI

Peşəkar həkimlərimizi tanıyaq! - Tibb üzrə fəlsəfə doktoru Elvin Əzizov

05.08.2022 10:21

“Həkimlərimizi tanıyaq!” rubrikamızda Sizlərə peşəkarlığı ilə seçilən və pasiyentləri arasında böyük rəğbət qazanmış otorinolarinqoloq, tibb üzrə fəlsəfə doktoru Elvin Əzizovu təqdim edirik.

Elvin Əzizov 2007-ci ildə Azərbaycan Tibb Universitetinin Müalicə-profilaktika fakültəsini bitirib, 2007-2009-cu illərdə Ukraynada Xarkov Diplomdansonrakı Tibb Akademiyasının Otorinolarinqologiya kafedrasında ordinatura, 2010-2013-cü illərdə isə aspirantura təhsili alıb. O, 2013-2015-ci illərdə Xarkov Diplomdansonrakı Tibb Akademiyasının Otorinolarinqologiya kafedrasında uşaq otorinolarinqoloqu kimi fəaliyyət göstərib. 2015-ci ildən Mərkəzi Gömrük Hospitalında həkim-otorinolarinqoloq kimi çalışır.

Həkim Mərkəzi Gömrük Hospitalında adenoidektomiya, tonzillektomiya, qulaq pərdəsinə parasentez boru yerləşdirilməsi, xarici qulağın plastikası, açıq və qapalı burun çəpər əyriliyi əməliyyatı, rinoplastika, burun polipləri və burun cibləri xroniki iltihablı xəstəliklərinin cərrahi yolla təmizlənməsi, boynun ön və yan divarının kistlərinin əməliyyatı, eləcə də qırtlaq biopsiyaları və poliplərinin xaric edilməsi əməliyyatını həyata keçirir.

O, 2014-cü ildə Ukraynanın paytaxtı Kiyev şəhərində A.S.Kolomiyçenko adına Elmi-Tədqiqat Otorinolarinqologiya İnstitutunda "Ağırlaşmış sinusitli xəstələrdə cərrahi müalicənin fotohemoterapiya istifadəsi ilə optimallaşdırılması" mövzusunda dissertasiya işini müdafiə edərək tibb üzrə fəlsəfə doktoru elmi dərəcəsi alıb.

Daim öz üzərində işləyən, qabaqcıl təcrübəni öyrənərək işində tətbiq edən Elvin Əzizov 2012-ci ildə Ukrayna həkim-otorinolarinqoloaqların elmi-tibbi birliyinin "LOR orqanlarının xroniki iltihabi xəstəliklərinin müasir müalicə və diaqnostika metodları" adlı elmi-praktiki konfransında, 2019-cu ildə Rusiyanın Sankt-Peterburq şəhərində burun boşluğu, paranazal sinusların və kəllə əsasının kadavra materialı üzərində endoskopik sinus cərrahiyyəsi kursunda iştirak edib.