Mərkəzi Gömrük Hospitalında ilk dəfə ürəyin aorta qapağı TAVI proseduru ilə dəyişdirilib.

Prosedur Mərkəzi Gömrük Hospitalının Kardiologiya şöbəsinin rəisi, struktural ürək xəstəlikləri üzrə yandal uzmanı, invaziv kardioloq Dr.İlqar Tahiroğlu və komandası tərəfindən Mərkəzi Gömrük Hospitalında açıq ürək əməliyyatı aparılmadan, bud arteriyasından girilərək həyata keçirilib.

Kateter vasitəsilə bud arteriyasından daxil olub, ürək qapağının protezləşdirilməsi müasir tibbi texnologiyaların tətbiqi sayəsində mümkün olub və tibbin ən son nailiyyətlərindən biri hesab olunur.TAVI (Transkateter Aorta Qapağı İmplantasiyası) əməliyyatı zamanı qasıq bölgəsindəki kiçik kəsikdən bud arteriyasına girilir, kateter ürəyə çatdıqdan sonra ürəyin sol mədəciyi ilə aorta damarı arasındakı qapaq süni qapaq protezi ilə əvəz edilir.

Açıq üsulla ürək qapaqlarının dəyişdirilməsi ilə müqayisədə TAVI əməliyyatının bir sıra üstünlükləri vardır: əməliyyat zamanı ürəyin dayandırılmasına, süni ürək qan dövranına ehtiyac olmur, döş qəfəsi açılmadığı üçün əməliyyatdan sonra sağalma müddəti qısa olur, ağırlaşma faizi olduqca aşağıdır, əməliyyat qısa müddətdə başa çatır və xəstə əməliyyatdan 24-48 saat sonra evə yazılır.

TAVİ əməliyyatı xüsusilə ciddi yanaşı xəstəlikləri olan yaşlı xəstələrdə, ağciyər, qaraciyər, böyrək funksiyaları pozulmuş insanlarda tətbiq olunur, çünki bu xəstələrdə açıq ürək əməliyyatından sonra ağırlaşma riski olduqca yüksəkdir.