İcbari Tibbi Sığorta üzrə Dövlət Agentliyi, TƏBİB, Səhiyyə Nazirliyi və İSİM-in təşəbbüsü ilə Gəncə Şəhər Birləmiş Xəstəxanasında “Uşaqlarda şəkərli diabet” mövzusunda konfrans təşkil olunub.

 

Tədbirdə Gəncə ilə yanaşı, Tovuz, Şəmkir, Goranboy, Mingəçevir, Yevlax, Şəki, Bərdədən olan pediatr, endokrinoloq və reanimatoloqlar iştirak ediblər.

 

Endokrinoloqlar Cəmiyyətinin sədri Gündüz Əhmədov, Azərbaycan Tibb Universitetinin (ATU) II Uşaq xəstəlikləri kafedrasının assistenti İlsuz Novruzov, Respublika Endokrinoloji dispanseri ADL Cəmiyyətinin sədri Yeganə Sultanova, ADL Cəmiyyətinin sədrinin müavini Səriyyə Ağayeva, Pediatriya Elmi-Tədqiqat İnstitutunun pediatr endokrinoloqu Samirə Nəsibova, ATU-nun pediatr endokrinoloqları Nərminə Abaslı və Günay Cəbrayılova məruzələrlə çıxış ediblər.

 

Yığıncaqda uşaqlarda şəkərli diabetin etiologiyası, metabolik dəyişikliklər, risk faktorları, klinik əlamətləri və proqnozu, eyni zamanda şəkərli diabetin diaqnostikası və müalicəsi, insulinoterapiya, şəkərli diabetin insulin pompası ilə terapiyası, diabetik ketoasidoza müasir yanaşma, diabet zamanı qidalanma prinsipləri və digər aktual mövzulara toxunulub. Bununla yanaşı, iştirakçıları maraqlandıran suallar cavablandırılıb.

 

Sonda tədbirdə iştirak edən həkimlərə sertifikatlar təqdim olunub.

 

Qeyd edək ki, konfrans Azərbaycan Respublikası Səhiyyə Nazirliyinin Elmi Tibbi Şurası tərəfindən davamlı tibbi təhsil proqramı çərçivəsində akkreditasiya olunub.

 

Tədbirin təşkilatı dəstəyi “Novo Nordisk” şirkətinə aiddir.