Tədbirdə ölkəni təmsil edən nümayəndə heyətində Tibbi Ərazi Bölmələrini İdarəetmə Birliyinin (TƏBİB) Tibbi fəaliyyətin təşkili departamentinin Ana və uşaq sağlamlığının təşkili şöbəsinin məsləhətçisi Şəbnəm Şahgəldiyeva, həmçinin tabeli müəssisələrdən həkim-pediatrlar, həkim-reanimatoloqlar, Azərbaycan Dövlət Həkimləri Təkmilləşdirmə İnstitutunun və Azərbaycan Tibb Universitetinin əməkdaşları, Abşeron, Ağdaş, Quba, Qusar, Şamaxı, Salyan rayon və Gəncə şəhər mərkəzi xəstəxanalarından əməkdaşlar olmaqla, ümumilikdə 15 nəfər iştirak edib.

 

Rusiya Federasiyası Səhiyyə Nazirliyinin Milli Elmi-Tədqiqat Mərkəzinin bazasında yerləşən simulyasiya mərkəzində keçirilmiş praktik və seminar hissədən ibarət təlimlərdə pediatriya, uşaq cərrahiyyəsi üzrə professor və müəllimlərdən ibarət heyət tərəfindən ümumilikdə 40 mühazirə dinlənilib. Mühazirələrin sonunda yaranmış kəskin klinik halların təhlili aparılıb.

 

Təxirəsalınmaz vəziyyətlərin düzgün idarə olunması, vaxtında düzgün tibbi yardımın göstərilməsi mövzularında 15 praktiki təlim (defibrillyatorun tətbiqi, lumbal punksiya, uşaqlarda tənəffüs yollarının keçiriciliyinin təmin edilməsi, intubasiya, yaraların birincili cərrahi işlənilməsi, plevral və perikardial punksiya, ürək ritminin pozulması zamanı ilk yardım, şoklar və ürək dayanması zamanı ilkin tibbi yardımın göstərilməsi, konikotomiya, uşaqlarda venoz və intraosseoz punksiyanın texnikası) keçirilib və simulyasion mərkəzin manipulyasiya və cərrahi otaqlarında yerləşən xüsusi mulyajlar üzərində praktikada tətbiq edilib. Simulyasiya mərkəzində texniki olaraq uşaqlarda ağır klinik hallar canlandırılıb və komanda şəklində tapşırıqlar icra olunub.

 

Təlimlərdə iştirakçılara müxtəlif dərs vəsaitləri və metodik kitabçalar təqdim edilib, uşaq sağlamlığının qorunmasına xidmət edən, uşaqlarda ölümə səbəb olan təcili, təxirəsalınmaz hallarının idarəedilməsi istiqamətində faydalı və məhsuldar məlumatlar verilib.

 

Təlimin yekununda iştirakçılar imtahan edilərək sertifikatlar təqdim edilib.