İyulun 5-də Azərbaycan Respublikası Dövlət Gömrük Komitəsi Tibbi Xidmət İdarəsinin Elmi-Təcrübi və Tədris Mərkəzinin, Mərkəzi Gömrük Hospitalının və "Spektr Med" şirkətinin birgə təşkilatçılığı ilə “Kliniki laborator müayinələrin yeni nəsil Sysmex sistemləri vasitəsi ilə tədqiqi” mövzusunda vebinar həyata keçirilib.

Azərbaycan Respublikası Dövlət Gömrük Komitəsi Tibbi Xidmət İdarəsinin rəis müavini, t.ü.f.d., dosent İsmayıl Əfəndiyev vebinar iştirakçılarını salamlayaraq diaqnozun qoyulmasında və uğurlu müalicə işinin təşkilində laborator nəticələrin doğruluğunun əhəmiyyətini qeyd edib. O, Mərkəzi Gömrük Hospitalının laboratoriyasının ən müasir avadanlıqlarla təchiz olunduğunu vurğulayaraq bu sahədə çalışan mütəxəssislər üçün davamlı olaraq təkmilləşdirici tədbirlərin həyata keçirildiyini söyləyib.

Vebinarın mütəxəssislərarası təcrübə mübadiləsi üçün maraqlı bir platforma olacağına inamını ifadə edən İ.Əfəndiyev çıxışının sonunda tədbirin işinə uğurlar arzulayıb.

Daha sonra "Spektr Med" şirkətinin texniki dəstək və təlim şöbəsinin müdiri Sərxan Nəcəfli və satış və marketinq şöbəsinin baş mütəxəssisi Zülfü Bayramlı çıxış edərək davamlı və uğurlu əməkdaşlığa görə təşəkkür ediblər. Onlar dinləyiciləri sual-cavab və müzakirələrdə aktiv olmağa səsləyiblər.

Mərkəzi Gömrük Hospitalının Laboratoriya şöbəsinin rəisi Sevinc Gülmalıyevanın moderatorluğu ilə həyata keçirilmiş tədbirdə "Spektr Med" şirkətinin Axın Sitometriyası və Klinik Kimya üzrə Məhsul Meneceri Ramazan Ayaş və Hematologiya və Koaqulyasiya üzrə Məhsul Meneceri Özgen Büyükgöze kliniki laborator müayinələrin yeni nəsil, Yaponiya istehsalı Sysmex sistemləri vasitəsilə tədqiqi prinsiplərinə dair məruzə ilə çıxış ediblər, eləcə də dinləyiciləri maraqlandıran sualları cavablandırıblar.

Tədbirdə Mərkəzi Gömrük Hospitalının həkimləri, orta tibb personalı və rezidentlər iştirak ediblər.

Daha geniş auditoriyanın maarifləndirilməsi məqsədilə vebinar Mərkəzi Gömrük Hospitalının rəsmi facebook səhifəsi üzərindən canlı yayımlanıb.