Hemofiliyalı Xəstələrin Respublika Assosiasiyasının nümayəndə heyəti Belçikanın Brüssel şəhərində keçirilən, 40-dan artıq Avropa ölkələrinin Pasiyent Təşkilatlarını özündə birləşdirən Avropa Hemofiliya Konsorsiumunun Beynəlxalq Liderlər Konfransında iştirak edib.

Tədbirdə qanın laxtalanma pozğunluğu ilə bağlı olan xəstəliklərin müalicəsində elmin son nailiyyətləri barədə ətraflı məlumat verilib. Hemofiliya A və Hemofiliya B xəstəliklərin müalicəsində yeni uzun müddətli qanın laxtalandırıcı faktor preparatları ilə müalicənin tətbiqi, gen terapiyası və ən əsası həkim və pasiyent münasibətlərinin vacibliyi vurğulanıb.

Keyfiyyətli müalicənin tətbiqi üçün həkimin pasiyentə doğmalıqla yanaşması və pasiyentin özü ilə müalicənin gedişatında məsləhət edilməsinin önəmi qeyd edilib.

Konfransda, həmçinin müasie dünyada pasiyent təşkilatlarının səhiyyə qurumları ilə sıx əməkdaşlığının vacibliyi xüsusi vurğulanıb.

Bundan başqa, laxtalanma pozğunluğundan əziyyət çəkən qadınların müalicəsinin və psixoloji durumlarının diqqət mərkəzində saxlanılması haqda geniş müzakirələr aparılıb.