Narkomaniya ilə mübarizə hər bir vətəndaşın mənəvi borcudur. Gəncləri bu bəladan qorumaq, onlarda sağlam həyat tərzini formalaşdırmaq üçün hamı birgə mübarizə aparmalı, yeniyetmə və gənclər arasında maarifləndirmə işi daim diqqət mərkəzində saxlanılmalıdır.

Bu fikirlər Qax rayon Mərkəzləşdirilmiş Kitabxana Sisteminin (MKS) C.Cabbarlı adına Mərkəzi kitabxanasında keçirilən “Gələcəyimizi birlikdə düşünək, narkomaniyaya yox deyək!” mövzusunda maarifləndirici tədbirdə səsləndirilib.

Məktəbli və yeniyetmələrin iştirak etdiyi tədbirdə Qax rayon MKS-nin direktoru Güllü Əhmədova çıxış edərək, narkotik maddələrin insan sağlamlığına və psixologiyasına mənfi təsirləri, gələcəkdə ailə həyatında və reproduktiv sağlamlıqda yaratdığı fəsadlar barədə məlumat verib. Bildirilib ki, narkomaniyanın yayılması millətin sağlam həyat tərzi üçün təhlükə törədir, narkotik maddələrin qəbul edilməsi ilə insan fiziki və psixoloji cəhətdən məhv olur. Narkomaniya yaddaş və təfəkkürü pozur, həyati proseslərə qarşı laqeydlik yaradır. Narkomaniya orqanizmin zəifləməsinə, bədənin arıqlamasına və fiziki gücün düşməsinə gətirib çıxarır. Orqanizmin zəhərlənməsi daxili orqanların, xüsusən də qara ciyər və böyrəklərin funksiyasının pozulmasına səbəb olur.

Diqqətə çatdırılıb ki, cəmiyyətdə “ağ ölüm” kimi qəbul edilən, müalicəsi olduqca çətin və uzun müddət tələb edən, insan cəmiyyətinin mənəvi və əxlaqi dəyərlərinə böyük zərbə vuran narkotik vasitələr, onların qanunsuz dövriyyəsi, istifadəsi, satışı, ümumiyyətlə, narkomanlıq ən ağrılı problemlərdən, qorxulu vərdişlərdən birinə çevrilib.

Tədbirin sonunda iştirakçılara maarifləndirici buklet paylanılıb, mövzuya aid film nümayiş etdirilib.