Azərbaycan Tibb Universitetinin ictimai fənlər kafedrasının müdiri, professor Qoşqar Əliyev Türkiyə Cümhuriyyətinin Niğde şəhərində keçirilən IX Beynəlxalq Türk Dünyası Araşdırmaları simpoziumunda iştirak edib.

Universitetin mətbuat xidmətindən verilən xəbərə görə, “Türkiyə və Azərbaycanda narkotiklərlə mübarizə haqqında” mövzusunda məruzə ilə çıxış edən professor narkotik maddələrdən ilk istifadənin 4 min il əvvələ təsadüf etdiyini və hazırda yayılmaqda olduğunu diqqətə çatdırıb:

“Bu gün dünyada, o cümlədən Türkiyə və Azərbaycanda həmin bəlanın qarşısını almaq məqsədilə tədbirlər həyata keçirilir. Xüsusi olaraq qeyd etmək lazımdır ki, torpaqlarımızın Ermənistan tərəfindən işğalı dövründə nəzarətdən kənarda qalan həmin ərazilərdə narkomaniya tüğyan edirdi. Onlar narkotiklərin satışından böyük vəsait qazanırdılar. İşğal dövründə həmin ərazilər həm də narkotik maddələrin trafiki rolunu oynayırdı.

44 günlük Vətən müharibəsində Azərbaycan Ordusunun torpaqlarımızı işğaldan azad etməsi sayəsində həmin ərazilərdə narkotik becərilməsinə, istehsalına, satışına və dövriyyəsinə birdəfəlik son qoyuldu, bölgədə quruculuq işləri başladı”.

Q.Əliyev çıxışında Türkiyə və Azərbaycanda “ağ ölüm” mənzərəsi və ona qarşı mübarizənin əhəmiyyətini dəyərləndirib. Qeyd edib ki, başqa dövlətlərlə müqayisədə hər iki ölkədə bu sahədə geniş tədbirlər planı həyata keçirilir, qanunvericiliyin təkmilləşdirilməsinə diqqət artırılır.

Professorun simpoziumdakı məruzəsi bəyənilib və Niğde Universitetinin rektoru, professor Hasan Uslu tərəfindən ona sertifikat verilib. Sonra Qoşqar Əliyev bölümün rəhbəri kimi iclası aparıb, məruzəçilərə sertifikatlar təqdim edib.