Səhiyyə Nazirliyi ilə Ailə, Qadın və Uşaq Problemləri üzrə Dövlət Komitəsinin birgə əməkdaşlığı ilə Siyəzən Rayon Heydər Əliyev Mərkəzində “Uşaqların doğulanadək cins seçiminə qarşı mübarizə” mövzusunda tədbir keçirilib.

Səhiyyə Nazirliyi İctimai-Səhiyyə İslahatlar Mərkəzinin (İSİM) rəsmi instaqram səhifəsindən əldə olunan məlumata görə, tədbirdə İSİM-in həkim-metodisti Zümrüd Kazımova mövzu üzrə təqdimatla çıxış edərək, hamiləliyin süni surətdə pozulmasının qadınların reproduktiv sağlamlığına və psixoloji durumuna göstərdiyi mənfi təsirindən danışıb və sağlam uşaqların doğulmasının vacibliyini vurğulayıb. O, arzuolunmaz hamiləliyin qarşısının alınmasına dair mövcud olan müasir üsullar barədə tədbir iştirakçılarını məlumatlandırıb.

Ailə, Qadın və Uşaq Problemləri üzrə Dövlət Komitəsinin Ailə problemləri şöbəsinin müdir müavini Kamilə Əliyeva təqdimatla çıxış edərək, uşaqların doğulanadək cins seçiminə görə hamiləliyin süni surətdə pozulması hallarının və oğlan uşaqlarının sayının artmasının gələcəkdə ölkənin demoqrafik və sosial-iqtisadi inkişafına mənfi təsir göstərə biləcəyini bildirib.

Siyəzən Rayon İcra Hakimiyyətinin nümayəndəsi, Yetkinlik yaşına çatmayanların işləri və hüquqlarının müdafiəsi üçün komissiyanın məsul katibi Günel Ağayeva çıxış edərək, Azərbaycanda əhalinin dinamik artımının və milli maraqlara cavab verən demoqrafik təhlükəsizliyin təmin olunmasının, gələcəkdə sağlam nəslin yetişməsinin dövlət siyasətinin prioritet istiqamətlərindən olduğunu deyib.

Yekunda iştirakçıları maraqlandıran suallar cavablandırılıb.