Bu gün Azərbaycan Tibb Universitetinin (ATU) Tədris Terapevtik Klinikasında 17 iyun - Tibb İşçilərinin Peşə Bayramı Günü münasibətilə tədbir keçirilib.

 

Klinikanın direktoru, professor Surxay Musayev çıxış edərək, rəhbərlik etdiyi tibb müəssisəsinin əməkdaşlarının timsalında bütün səhiyyə işçilərini əlamətdar gün münasibətilə təbrik edib, onlara cansağlığı və tutduqları bu şərəfli yolda uğurlar arzulayıb.

 

Əlamətdar günün yaranma tarixindən danışan Surxay Musayev bildirib ki, 1918-ci ilin 17 iyun tarixində ilk dəfə olaraq Azərbaycanda Səhiyyə Nazirliyi təsis olunub. Bunu əsas götürən ümumilli lider Heydər Əliyev 2001-ci il iyunun 4-də imzaladığı Sərəncama əsasən hər il iyunun 17-si ölkəmizdə Tibb İşçilərinin Peşə Bayramı Günü kimi qeyd olunur.

 

Direktor səhiyyənin inkişafından, eləcə də ölkə Prezidenti İlham Əliyev və birinci xanım Mehriban Əliyevanın ölkəmizdə tibb sahəsinə ayırdığı diqqət və qayğısından bəhs edib. Bildirib ki, son 15 ildə Azərbaycan Tibb Universitetində 4 böyük klinikanın - Onkoloji, Stamotoloji, Tədris Terapevtik və Tədris Cərrahiyyə klinikalarının fəaliyyətə başlaması bunun bariz nümunəsidir. Həmçinin ölkədə yeni tibb ocaqlarının yaradılması, köhnələrinin əsaslı təmir olunması da səhiyyəyə göstərilən qayğının təzahürüdür.

 

Daha sonra klinika əməkdaşlarına Azərbaycan Tibb Universitetinin rektoru, professor Gəray Gəraybəyli və Tədris Terapevtik Klinikasının direktoru, professor Surxay Musayev tərəfindən imzalanmış Fəxri fərman və Təşəkkürnamələr təqdim ediıib.

 

Həmçinin profesor Gəray Gəraybəylinin Tibb İşçilərinin Peşə Bayramı Günü münasibətilə təbriki əməkdaşların diqqətinə çatdırılıb.