Səhiyyə Nazirliyi İctimai Səhiyyə və İslahatlar Mərkəzi (İSİM) tərəfindən Azərbaycan Respublikası Fövqəladə Hallar Nazirliyinin Akademiyasında zərərli vərdişlərə qarşı mübarizə mövzusunda maarifləndirici tədbir keçirilib.

Aztibb.az İSİM-ə istinadla bildirir ki, zabit və kursantların iştirakı ilə təşkil olunan tədbirin məqsədi gənc nəsli sağlam həyat tərzi istiqamətində maarifləndirmək, qeyri-infeksion xəstəliklərin əsas risk faktoru olan tütünçəkmə, narkomaniya kimi zərərli vərdişlərin təhlükəli fəsadları barədə onlara ətraflı məlumat vermək idi.

Tədbirdən sonra İSİM tərəfindən kursantlar üçün “Zərərli vərdişlərə yox deyək!” mövzusunda maarifləndirici aksiya təşkil olunub. Aksiya iştirakçılarına bir daha sağlam həyat tərzinin üstünlükləri və zərərli vərdişlərin sağlamlığa təhlükəli təsirləri barədə məlumat verilib.

Aksiyada “Mən siqaret çəkmirəm! Sən də çəkmə!” selfi generatorundan istifadə etməklə fotoşəkillər çəkilib, akademiyanın kursantı Yulət Əsgərovun çəkdiyi rəsm nümayiş olunub, iştirakçılara İSİM tərəfindən hazırlanaraq nəşr edilən maarifləndirici materiallar paylanılıb.