Ümumdünya Səhiyyə Təşkilatının (ÜST) Şamaxı rayonunda ilkin səhiyyə xidmətlərinin gücləndirilməsi məqsədilə həyata keçirdiyi "PROACT-Qayğı” layihəsi çərçivəsində ictimai səhiyyə xidmətlərinin yaxşılaşdırılması məqsədi ilə bir qrup səhiyyə üzrə mütəxəssis Türkiyə Respublikasında səfərdədir.

Nümayəndə heytinə Səhiyyə Nazirliyinin Səhiyyənin təşkili şöbəsinin müdiri Anar İsrafilov, İcbari Tibbi Sığorta üzrə Dövlət Agentliyinin Strateji təhlil departamentinin rəhbəri Araz Nəsirov, TƏBİB-in Tibbi fəaliyyətin təşkili departamentinin rəhbəri Teymur Mirzəbəyli, Azərbaycan Tibb Universitetinin və aidiyyəti səhiyyə qurumlarının nümayəndələri daxildir.

Səfər zamanı nümayəndə heyəti Dokuz Eylül Universitetində olub, universitetin rəhbərliyi ilə görüşərək əməkdaşlıq istiqamətlərini müzakirə ediblər.

Qeyd edək ki, "PROACT-Qayğı” layihəsi Azərbaycan üçün məqsədəuyğun ilkin səhiyyə sistemi modelinin yaradılmasını nəzərdə tutur ki, bu model genişləndirilərək ölkənin digər ərazilərində də tətbiq edilə bilər.

ÜST-nin Azərbaycandakı Nümayəndəliyi layihənin icra olunmasında Şamaxı Rayon İcra Hakimiyyəti, Səhiyyə Nazirliyi, İcbari Tibbi Sığorta üzrə Dövlət Agentliyi, TƏBİB, Heydər Əliyev Fondu, UNICEF və BMT-nin Əhali Fondu ilə tərəfdaşlıq edir.

Ümumdünya Səhiyyə Təşkilatının (ÜST) Azərbaycandakı Nümayəndəliyi tərəfindən həyata keçirilən layihə ABŞ-ın Beynəlxalq İnkişaf Agentliyi (USAID), Böyük Britaniyanın "Ukaid”, Rumıniyanın "RoAid” təşkilatları və "UHC-Əməkdaşlıq” təşəbbüsü (ÜST-nin tərəfdaşları ilə ortaq layihəsi) tərəfindən maliyyələşdirilir.

İcbari Tibbi Sığorta üzrə Dövlət Agentliyi
World Health Organization Azerbaijan
Dokuz Eylül Üniversitesi