Rusiyanın Elmlər Akademiyasının Tibbi Nanobiotexnologiya kafedrasının rəhbəri Vladimir Pavloviç Çexonin və Fundamental Tibb bölümünün rəhbəri, akademik Mamed Əliyev Cavadoviç Azərbaycana səfər çərçivəsində İ.M. Seçenov adına Birinci Moskva Dövlət Tibb Universitetinin Bakı filialı və Bakı Sağlamlıq Mərkəzindəölkəmizdə səhiyyə sahəsində görülmüş işlərlə bağlı görüşlər keçiriblər.

Aztibb.az xəbər verir ki, Bakı Sağlamlıq Mərkəzinin icraçı direktoru Asiman Həsənov Mərkəzin fəaliyyəti ilə bağlı ətralı məlumat verib və qonaqları Mərkəzin fəaliyyət sahələri ilə tanış edib.

Bundan sonra İ.M. Seçenov adına Birinci Moskva Dövlət Tibb Universitetinin Təlim və Simulyasiya Mərkəzində görülmüş işlər barədə universitetin rektoru professor Əziz Əliyev tərəfindən qonaqlara ətraflı məlumat verilib və qonaqlar universitetdə yaradılmış şəraitlə tanış edilib.

Təlim və Simulyasiya Mərkəzinin rəhbəri Zəhra Vəzirova aparılan təlim-tədris prossesi, tələbələrin biliklərinin qiymətləndirilməsi sahəsində tətbiq olunan yeniliklər barədə çıxış edib.

Qonaqlar bu günə qədər Azərbaycanda səhiyyə sahəsində görülən işləri yüksək qiymətləndirib və təlim-tədris üçün yaradılan şəraitdən məmnunluqlarını bildiriblər.

Görüşün sonunda xatirə şəkili çəkilib.