İyunun 8-də Elmi-Tədqiqat Ağciyər Xəstəlikləri İnstitutunda (ETAXİ) Yaponiyanın “Fujifilm” şirkətinə məxsus “FDR X-air” portativ rentgen avadanlığının satın alınması ilə əlaqədar layihənin açılış mərasimi keçirilib.

Süni intellektə malik portativ rentgen aparatı beynəlxalq təşkilat “Stop TB Partnerşip” qurumunun konsultativ dəstəyi və Yaponiyanın ölkəmizdəki səfirliyinin maliyyə yardımı ilə vərəm əleyhinə QHT koalisiyasının aparıcı təşkilatı olan “Sağlamlığa xidmət” İctimai Birliyi (İB) tərəfindən Azərbaycana gətirilib.

Məqsəd Azərbaycanda vərəm hallarının erkən aşkarlanmasına dəstək olmaq, vərəmin ən çox yayıldığı rayonlarda və xüsusilə ucqar ərazilərdə yaşayan insanlar üçün vərəmin müayinə və müalicəsinə əlçatanlığı təmin etmək, vərəmlə mübarizə işinin bütün tibb xidmətlərinə inteqrasiyasını gücləndirmək, bütün risk qrupları arasında sistematik skrininq aparmaqdan ibarətdir.

Tədbirdə Yaponiyanın ölkəmizdəki səfiri Cuniçi Vada, TƏBİB-in Strateji inkişaf departamentinin rəhbəri Yaqut Qarayeva, ETAXİ-nin direktoru İradə Axundova, TƏBİB-in Beynəlxalq əməkdaşlıq şöbəsinin müdiri Ramin Ağayev, Səhiyyə Nazirliyinin Sanitar-epidemioloji nəzarət şöbəsinin müdiri Nəzifə Mürsəlova, Beynəlxalq əlaqələr şöbəsinin müdiri Vahid Əliyev, ölkə əlaqələndirmə mexanizminin maliyyə və proqram meneceri Aytən Hüseynova, ETAXİ-nin tibb heyəti, Vərəm Əleyhinə QHT Koalisiyasının üzvləri və media nümayəndələri iştirak ediblər.

Çıxış edən Yaqut Qarayeva, İradə Axundova , Ramin Ağayev və Nəzifə Mürsəlova vərəm xəstəliklərinin erkən aşkarlanmasında müasir rentgen aparatının müstəsna rol oynayacağını bildiriblər.

Çıxışçılar vərəmin ən çox yayıldığı rayonlarda, xüsusilə ucqar ərazilərdə yaşayan insanlar üçün vərəmin müayinə və müalicəsinə əlçatanlığı təmin etmək istiqamətində davamlı və təxirəsalınmaz işlər görüldüyünü bildirib.