Azərbaycan Tibb Universitetinin (ATU) Yoluxucu xəstəliklər kafedrasının dosenti, Tədris Cərrahiyyə Klinikasının şöbə müdiri Sədrəddin Abdulla oğlu Atakişizadəyə Azərbaycan Respublikasının Prezidenti yanında Ali Attestasiya Komissiyasının qərarı ilə tibb elmləri doktoru elmi dərəcəsi verilib.

Aztibb.az-ın məlumatına görə, o, "Cərrahi klinikalarda xəstəxanadaxili infeksiyaların etioloji strukturu və risk amilləri" mövzusunda dissertasiya işini ötən ilin may ayında müdafiə edib.

Tədqiqat işi hazırda tibbin aktual problemlərindən biri olan xəstəxanadaxili infeksiyaların etiologiyasına həsr olunub. Tədqiqat nəticəsində cərrahi klinikalarda rast gəlinən pnevmoniyaların cərrahi müdaxilə nahiyəsi infeksiyalarının, sidik yolları infeksiyalarının və septiki infeksiyaların etioloji strukturunun dominant törədiciləri aşkarlanıb, onların antimikrob preparatlara həssaslığı, rezistentliyi və rezistentlik mexanizmi müəyyən edilib, xəstəxanadaxili infeksiyaların risk amilləri öyrənilib.

Praktiki həkimlərə xəstəxanadaxili infeksiya törədiciləri sırasında dominantlığı ilə seçilən ştamların əksər antibiotiklərə qarşı davamlı olmasının nəzərdə saxlanılması tövsiyə edilir.